barongbarong, sarong barongbarong nin aripuros asin dagoldol na mayong tagdo nin oran, mga siloksigok na daing mga luha, mga kurdhaw na daing mga kataga, nagoongal sa saiyang daghan asin masulwak siring sa mainit na lava haloy nang nahahagwis (339), sibot na lominuwas sa lambanan. Nadangog ni Basilio na lominosad sya sa hagyanan na bakong sorokol su mga lakad, baralanggo; nakadangog nin sarong garo napopdot na kinurahaw, kurahaw na garo naghaharubay kan pagdatong kan kagadanan, hararom, nangongorog, malipungaw, mala ngani, ta su hagbayon bominuhat sa saiyang silla, malungsi asin tinanatakigan, alagad nadangog su mga linakad na nagkakaparara asin su pata sa may lansangan na matanog sa nagpipinto.
“Makauugay na ginoo!” an sabi sa hababang tingog asin su saiyang mga mata napano nin mga luha,
Asin dai nakagiromdom na magadal, nakakalakop su paghiling sa ruwang pagiisipisip kan kapaladan kan duwang itong linalang, su sarong hagbayon, mayaman, halangkaw an inadalan, hiwas, kagrogaring kan saiyang mga kapaladan, may masagang ngapit sa panahon sa harayo, asin sya, magayon siring sa sarong pangatorogan, dalisay, pano nin pagtubod asin daing pagalamaam, pinagtotorotabyon sa tahaw nin mga pagkamoot asin nin mga hoyom, natatalaga sa sarong magayagayang adha (340), na pakamahalon sa angkos asin galangan sa kinaban, asin minsan siring, sa duwang itong linalang na mga tagob nin pagkamoot, nin mga penarangan (341) asin mga pagsarig, huli sa sarong mapanggadan na kapaladan naglalakaw syang lagalag sa kinaban ginogoyod daing ontok nin sarong arimborong nin dugo asin nin mga luha, nagsasabwag kan karat-an sa lugar na magibo nin marahay, ibinabagsak an kabanalan asin pinapadakula an maraot na kaugalean, alintanang sya naghihingagdan sa makagigilantas na limpoy kan claustro, na pinaghahanapan nya gayod kan katiwasayan asin sakalé makasompong nin mga pagtios, saen sya lominaog na malinig asin daing digta asin naotsan siring sa sarong loyos na burak!..
!Matorog ka sa katiwasayan, makautigay na aking babaye kan daing palad kong bansa! Lobongan sa hikay an mga kawilihan kan saimong pagkaaki, na lomi-
