natutunao siring sa taro an mag̃na buquid; iyan Lalaogon na panô nin cagayonan na sa paggalang tinatahoban nin mag̃na Serafines can saindang pacpac an saindang lalaogon; iyan Lalaogon na mapataniog g̃napit can bilog na quinâban, pinadugó nin sarong mabag̃nis na soquiti! Anong guinibo mo, Jesús co, sa siring na pagsopog sa imo? ¡Ah! an sa imong pagtios asin pagcahoyó labi pa sa gabos na mag̃na pagsopog, patin an sa imong g̃nosô day nabucá condi sa pagsimbag: Con maraot an itinaram co, ipahiling con tadao ta siring; alagad con bacô ¿ano ta quinocolgan mo aco? ¡Oh Dios co! nasosopog aco, ¿mayo ca na nin ibang tataramon na icasasabi sa nagbasang sa imo? ¡Oh pagtocdô sa cahalangcauan nin sacong boot! Pinapagpadanay mo an saimong pagcahoyô sa oras na idto sa pagtocdô sacô nin pagbárî can sacong pagpalangcao, asin tag̃naning magcamérito aco sa mag̃na oras na garo babaacon an sacong daghan nin caangotan, ano man casadang na casopogan an acôon co. Icapapahiling mo cutána an simong capangyarihan, con ipinahamil nin dagâ idtong daing ogaling oripon; alagad ta minarhay mong tocdóan aco nin pacatios na nacacadaog sa quinâban.
