"Ngunyan gabós kong nasáyang:
Palacio man, kahadean,
Síring man nganí kabilang
Dakulá na kayamanan;
Daing ibang natatadá,
Kundí mapait na luhá,
Na sakong dinadalitá,
Dai masábing horasá."
Pakasabi, natanawan
Mga hukbong nagsasakay,
Sa itaas su wagayway
Kan satúyang Katinubdan;
An namamayo sainda,
Ay, ito si Talavera,
Pagboot kan hadé ninda,
Sadirihon an Alhambra.
Ki Fernando Talavera,
Na bílang pamayo baga,
Makumbabang nagdóok na
Si Boabdil na monarca;
Iniho an itinaram,
Su tíngog makauúgay,
Lomgom sa kadalitaan,
Sangribong kahorasaan:
"Koaha pó, Kagurangnan,
Mga ontokan na iyán,
Tinagama kan Gugúrang93
Sa símong Hádeng halangkaw;
Si Alah nagtaong sílot
Sa kamorosan gabós,
Tara dí sinda nagkúyog,
Kan Batás nyang bulanos."
Daing nang ibang tinaram,
Su agareno naglakaw,
Kan pangkat nya sinondan,
Likos nin kadalitaan;
Mata dai sisalíngoy,
Su dagá ngáning hilingón,
Mondó gayod di sabihon,
Horasá dai nin sókol.
- 93 Hinandá kan Dios.
