An pahina na ini pigbalido
— 7 —
Kan akí pa akong sadang,
Pagtubod nyakó mahusay;
Simong simuy na dalisay
Pusó ko pinagkaogdan
Nin dakúlang kaogmahan;
Nakita ko an Kaglalang,
Duman sa kadakulaan
Kan símong mga kadlagan.
Saímong kadalitaan,
Dai nyakó namidbiran,
Hanggang natitingkalagan
An bughaw mong kalangitan;
Sa sakó dai nagkúlang,
Pagmumutyá, kalodokan,
Nasa Katalagahan
An sakong kamongayahan.
!Pagkaáking kalodokan,
Mabansayon na banwaan,
Burabod na mayaman
Mga kagayagayahan;
Makawiwíling lagaylay,
Sa horasá nagbubúgaw,
Magbalik kamo giráray,
Digdi sa sakúyang daghan!
Pagbalik kamong banayad,
Nin mga gamgam kasugad,
Nangagbabalik liwat,
Pagbuswang kan mga búrak;
Alágad, símo paáram,
Pagingati sagkod lámang
An simong katiwasayan,
Pálad, kapahingaloan.
