Mga talisaynon samuyá an apod,
kalag na dakulá, háwak na gatikot,184
na sa Dapitan, sa bílog na pórok,
an Talisay dai nagkaigwang gahod.185
Samong mga sagpan mga máyong rival,
harárom na angpas samong tinitikbay,186
na sa paggáod dai nin sakayán
na mangyari samó na makaombasan.
An mga problema sadyang kadonongan,
samong pigadalan kan bansá salaysay,
tolong horon, apat samong pigtataram,
pagtubod, pagísip, pigbabagaybagay.
An samúyang takyag napálakaw sabay
kan kutsilyo, sípol, asadol síring man,
an piko, an bádil, asin an baládaw,
mga talágad man laláking matibay.
!Magpakabuhay ka, marambong Talisay,
tíngog mi magsabay símo sa pagómaw,
maságang bitoon, mahalagang yaman,
langóbong na húlit asin karangahan.
Sa pakikibaka sa tawo náhalat,
mga sákit sákop, pakigobok nanggad,
an símong giromdom anting mong banayad,
ngaran mo sa húkay tiwásay nyang labat.
- 184 Sadit.
- 185 Kapantay.
- 186 Linolokso.
