sawale asin bulangan na nipá. An cura iyo an Papa sa Vaticano; su alférez (134) kan Guardia Civil iyo an Hadé sa Italia sa Quirinal (135) sábot na gayo na ini sókol sa pagkadakulá kan sawale asin bulangan na nipá. Asin digdi, siring man dumán padagos an kamorondoan, tara, lambang saró, sa pagísip na sya an máging amo, nakikita nya na bakó man na kakulangan an saiyang magkasi tawo. Ipaliwanag nyató asin satúyang isaysay an mga kakayahan kan lambang saró sainda.
Si Fray Bernardo Salvi iyo itong akí pa asin dai magparakaálong franciscano na dati nang sinambit nyamó. Huli kan saíyang mga kaugalean asin mga hiróhiró, napálaen na gayo sya sa saíyang mga túgang, orog na sa saiyang sinalihidan, an maangoton na si Padre Dámaso. Maníwang, herelangón, haros dánay na may iniísip, mahigpit sa pagotob kan mga kukuyogon dapit sa katinubdan asin maingat sa saíyang marhay na dangog. Pagkaáyaw nin sambulan pagdatong nya, haros gabós nagpangápil sa V.O.T. (136), dakúlang kamondoán kan kalaban kaito, su cofradía kan San tísimo Rosario. An kalag minalokso sa kaogmahan kun nakakakita sa lambang liog nin apat okun limang escapulario asin sa lambang habayan sarong cordón na may mga botngol asin an mga procesión na ito nin mga bangkay o mga fantasma na may mga hábitong guingón. Su sacristán mayor nagkaigwa nin kadikit na puhonan sa pagpabákal okun pagpalimós, na iyong pinagsasabing parati, kan gabós na mga bagaybagay na mga kinakaipuhan sa pakaligtas kan kalag asin sa pakilaban sa demonio; talastas na gayo na an espiritung ini nagngahas mamalantang (137), sa Dios mansana sa kahampang nanggad kaini, na an mga tataramon saiyang pinagborongborongan, na lominayog ki Jesucristo Kagurangnan ta, siring sa saiyang ginibo sa mga húkloban kan Edad Media, asin nagpapadagos, siring sa sarabisabi, sa paggibo kaiyán sa mga aswang sa Filipinas, garong lominuwas ngunyan na masosopgon na dai nakakahiling sa yamit na may naguguhit na duwang takyag, asin natatakot sa mga butngol, alágad daing ibang pinapatunayan an bágay na ini kundi iyo na may kauswagan man sa gamping iniho, asin mabagal an diablo okun maingat, siring sa gábos na nageérok sa kadikloman kun habó siyang sabihon na may kaluyahan nin sa
