kaliwanagan sa pagoltanan kan mga mahiribog na mga sanga may makalagbas na mga sirang kan bulan, garong nahihiling ko ika sa tahaw kan kadlagan siring sa nagpapard-paré sa liwanag asin sa diklom kan kahiwasan; asin kun ipinapadangog kan ruisehor (88) an saiyang manlaenlaen na huni, sa sakong akala, iyo ta nahihiling ka asin ta nadadagka mo sya sa pagawit. !Oho, pinagisip ko ika! !An init kan saimong pagmahal minabihay kan ambon asin minatao nin kiray sa hielo! Sa Italia, sa magayon na langit nin Italia, sa kalinigan asin sa kahalangkawan kaito nagpapagiromdom sakuya kan saimong hoyom, siring kan mga langtad sa Andalucia na nagaalimyo an simuy, pando nin mga sirangnon sa giromdom, pano nin mga rawitdawit asin kiray, nagsasabi sakuya kan saimong pagkamoot! Kun mga bangging bulanon, an bulan na itong baga nangangatorogan, sakay sa sarong sakayan sa Rhin, naghahapot sakuya kun dai ako dinadayo kan sakong hona-hona sa paghiling saimo sa masagoso, sa pangpang, sa bato nin Lorelay okun sa tahaw nin mga alon, na nagaawit sa kamoninongan nin banggi siring sa aki pang dalumbasa (84) nin mga karangahan sa pagpaogma kan pagsaro-saro asin kalipungawan kan orolag nang’ castillo!”
“Dai ako naglakbay na siring saimo, dai akong ibang midbid kundi an saimong banwaan, an Manila asin an Antipolo,” an simbag kan daraga na naghohoyomhoyom, tara naniniwala sya sa gabos na sinabi kan hagbayon; “alagad magpoon kan magsabi ako saimo nin paéram asin lominaog ako sa beaterio, sa giraray nagigiromdoman ko ika asin dai ko ika nalilingawan, minsan ngani ipinagboot sakuya kan confesor asin tinaohan ako nin makuring silot. Nagigiromdoman ko su satong mga kawat, su satong mga pagpasuhay kan saraday pa kita. Pinipili mo su mga marayrahay na buskay sa pagkawat nin siklot; naghahanap ka sa salog nin mga matalimon na gayo, malilinig asin manlaén-laén na kiray na mga gapo ta makawat kita nin sinta (85); mangmang kang marhay kaito, sa giraray dinadaog taka, asin bilang padusa, dinadapian ko ika kan sakong palad alagad dai ko kinokosog ta nahehérak ako saimo. Sa kawat nin songka madayaon kang marhay, labi pa sakuya, asin parati kitang nagkakambragan pakatapus. Nagigiromdoman itong pangyari na talagang nagkai-
