an mga pagkadaog na ito saiya mga talokso saiya kan langit sa pagparigon kan saiyang pagtubod asin devocion. Si Capitan Tiago minamahal kan mga cura, iginagalang kan mga sacristan, padangat kan mga parakandilang intsik asin kan mga paragibong cohetes, an tawong ini mamongaya sa katinubdan sa dagang iniho, asin sa mga bihasa asin mga tawong banal nangagsasahot na igwa siya nin dakulang lasig sa kalangitan. Dai dapat pagduwaduwahan na marhay an saiyang boot sa Pamahalaan, minsan garo kamagabat kan bagay na siring. Dai kaya na makapaglalang nin bagong kaisipan, asin mamongaya sa saiyang palakaw sa pagbuhaybuhay, sa giraray natatalagang magkuyog sa pinakahababang empleado kan Pamahalaan sa gabos na oficina, sa pagregalo nin mga jamon, mga kapon na manok, mga bungang-kahoy na mga hale sa China sa arin man na panahon sa laog kan taan, Kun nadadangog niyang pinaglilibak an mga katutubo, minasabaysabay man asin lalong magabat na manaramtaram, tara dai niya ibinibilang na siya sarong katutubo; kun pinaglilibliban an mga mestisong intsik okun an mga mestisong kastila, minaliblib man siya, sakalé, huli ta naghohona na siya lubéos na gayong kastila. Iyo an enot na minarokyaw sa ano man na pagboot na aboloy, naghorog na kun nakakaparong na igwa iyan nin kasunod na kontrato okun arrendamiento. Sa giraray may handang orquestra sa pagpataratara sa gabos na mga gobernador, mga alcalde, mga fiscal, asin dakol pang iba, sa saindang mga aldaw, mga aldaw na ikinamondag, okun pagkagadan nin sarong kadugo, sa sarong pagtaram, sa ano man na kaliwatan sa dating pigtotodan na kamugtakan. Sa siring na pangyayari, nagtotogon siya nin mga pangongomaw na mga rawitdawit saen irinorokyaw an maboot asin maugayon na gobernador, madasig asin marigon na alcalde asin pinaghalat siya sa langit kan parawog nin mga banal (okun palmeta) asin dakol pang ibang bagay.
Siya an gobernadorcillo kan mayayaman na pangkat nin mga mestizo, minsan ngani kadakol kan mga minasolang kaini ta dai siya ibinibilang na siring. Sa laog kan duwang taon na siya natutukaw nakasayang sya nin sampolong frac, nin siring mansanang bilang nin mga kalong de copa asin anom na baston; su frac asin kalong de copa sa Ayuntamiento, sa Malacañang asin
