nanunuga tanganing mapiritan asin maniwala sinda kan pagkadalisay kan saiyang mga pagmawot. Alagad an orog na saiyang pinanunugaan asin inootoban kan saiyang mga panuga matimaan, bako man malikay sa mga santong saraday; kun gayod, kun nakakamtan na an saiyang pinagmamawot, dai na nakakagiromdom sainda, totoo ngani na dai na man minasaringgaw sainda kun nagkakaigwa nin bahigay sa paggibo nin siring; talastas ni Capitan Tiago na kadakol na mga santo sa kalendario na mga dai nagkakagiriromdoman asin sakalé daing mga kagibogibo duman sa langit. Laen pa, saiyang pinamumugtak na an Virgen nin Antipolo lalong makapangyarihan sa gabos na mga Virgen, magdara man nin mga sogkod na pirak, magkilik man nin mga Niño Jesus na may gubing okun huba, mga rosariohan, okun mga correa; sakalé, gominikan ini sa mga sarabisabi na mahigpit na gayo an tinodan nang señora, lubos na maingat kan saiyang ngaran, habong pagkoahan nin mga ladawan, siring sa sabi kan sacristan mayor sa Antipolo, asin kun naaangot, nangingitom na garong kahoy na kamagong, asin ta an ibang mga Virgen mga malomoy an boot, mga matinaong bulanos: batid na gayo na may mga tawo na orog pang namomoot sa mga hadeng absoluto ki sa hadeng constitucional, magsabi si Luis XIV asin si Luis XVI, si Felipe II asin si Amadeo I. Sakalé, iyo ini an dahelan na sa bantog na santuario makitang maglakaw nin tohod an mga intsik na mga bakong bonyag pati mga kastila, iyo sana ta dai ikinapapaliwanag kun ano ta idinodulag kan mga cura an kuwarta kan makagigilantas na longon (43), maduruman sa America asin, su boot, minaaragom duman.
An tatang ito sa bidang nalilipdan nin sarong tabing na sukla (44) pasiring sa sarong sadit na capilla okun oratorio na dai sukat magkulang sa arin man na harong nin filipino: iritoon duman sa mga pangharong na mga dios ni Capitan Tiago, asin sinabi nyamong mga pangharong na dios, huli ta an tawong ini lalong apling sa politeismo (45) ki sa moneteismo (46) na sagkod pa man dai nya nasasabotan. Duman nakikita an mga longon kan Sagrada Familia na gading an lawas asin takyag sagkod kamot, mga yuruwad na pirok asin korong patin bulaw na buhok, orog karahay an paluwas kan paggibong ladawan sa Santa Cruz. Mga cuadro al
