mangno na nasa túbig sya; monínong su dánaw asin natatanaw pa nya su mga ilaw sa mga kamálig kan mga parasirá.
Bominalik sa gílid asin napasíring sa banwaan, anong tuyo? Sya mansana daing pakaáram.
Garong dai nin tawo sa banwaan; pirintó su gabós na mga harong; síring man su mga hayop, su mga áyam na paráting magbarátok kun banggi, nagpanaragó sa katakutan. Su nagsisilaksigak na liwanag kan talásínag minapáorog kan kamondoan asin kalipungawan.
Sa tákot na makanagbó sya nin mga Guardia Civil, lominaog sa mga lagwerta asin sa mga tanaman, sa saró kan mga ini na paghoná nakakita sya nin duwa katawo; alagád nagpadagos sya kan saíyang lakaw, asin, pakapaglokso nya sa parel asin sa mga kodal, sa makuring kapagalan nakadatong sa ibong na poro kan banwaan, napasíring sa harong ni Crisóstomo. Sa may tatá iritoon su mga sorogoon na nagoorólay asin nangagmomondó kan pagkabilanggo kan saindang kagurangnan.
Hominarayó si Elías, kan matalastas nya su nangyari, lominibot sa harong, ominoyakpat sa parel na kodal, kominamang sa bintaná asin lominaog sa gabinete, saen nagkaláad pa su kandilá na nabáyaan ni Ibarra.
Nakita ni Elías su mga papeles asin su mga libro; nákoa su mga hamo asin su mga sopot na nagkaburugtakan kan kuwarta asin kan mga alahas. Binúhay nya sa saíyang pagísip su nangyari dumán, asin kan makita nya an dakol na mga papeles na mangyáring makadara sa panganib, inisip nyang koroahon an mga ito, itarapon sa bintaná asin irolobong.
Tominanaw sa tatamnan, asin sa liwánag kan talásinag nakakita nin duwang Guardia Civil na may sarong kagawad: nanirilaksigak su mga bayoneta asin su mga capacete.
Sa bágay na síring igwa nin naísipan: sa táhaw kan gabinete may tinarambak na mga gúbing asin mga papeles, iinolá sa ibabaw su laog kan sarong lámparang sa gas asin sinabritán. Madaleng-madaléng ihiníos su hamo, nakita su ladawan ni María Clara, nangalangálang... ibinugtak ito sa saró kan mga sopot, asin, dara an mga ito na tominagbang sa bintaná.
Horas na; su mga Guardia Civil nangagpipírit na lumaog.
"!Pasakata kami nindo ta kokoahon nyamó su mga
