kakasarabat na mga daraga na iniiribabá an mata pag-agi sa tangod niya na dai lámang, siring sa magkakanigó, pinagtakahan su saiyang mahalagang panggubingan. Su cochero ni Sinang na nagdadara kaini asin
kan saiyang pinsan sa saiyang marayráhay na tres-porciento (67-a) nangáhas na komoráhaw saiya nin "!tabi!" sa mapangyaring tingog, na daing iba siyang nasabi kundi, "!Hilinga an daing úgáleng cochero na iyan!
Sasabihan ko an saiyang amo na adalan nin marhay
an saiyang mga sorogoón."
"!Magbalik na kita sa harong!" an pagboot sa saiyang agom.
Ini, natatakot na magkaigwa nin barongbarong, bominirik sa saiyang muleta sa pagkúyog kun ipinagboot. Nasompongan ninda su alférez, nagpatinaratarahan asin ta ini nakapadúgang kan kabaldian ni Doña Victorina, su militar bakó sanang dai tinino su saiyang panggubingan kundi hiniling pa ito nin mapagologólog na paghiling.
"Dai ka sukat nakigkamayan sa saró lámang na alférez," an sabi sa saiyang agom pakahalé kan alférez; "pahangá nang dootan kaito su saiyang capacete asin ika tinokas mo su saimong kaló; dai ka tataong magingat kan rango!"
"Sya an pamayo... digdi!"
"Anó satuyá? Sakalé, mga indio kita?"
"Tamá ka!" an isinimbag ta habong makipagribok.
Nagagi sinda sa tangod kan harong kan militar. Si Doña Consolacion, siring sa saiyang pinagtotodan, nasa bintaná, nakagúbing nin franela asin nagpipinadis. Nin huli ta hababá su harong, naghinirilingan asin ta namaanan siyang marhay ni Doña Victorina matoninong na pigparahiling sya kan Musa kan Guardia Civil magpoón sa bitis sagkod sa payo, asin pakapahalabaa kan ngodoy, kominuspá na tominnoparing sa-ibong. Ini an nakatapus kan pagkamatios ni Doña Victorina, asin pakabayaeng dai nin gábay su saiyang agom, tominindog sa atúbang kan alféreza, na tinatakigan sa kaangotan asin dai nakapagtaram. Luhaylúhay na lominingoy si Doña Consolación, pinagparahiling namán ito asin lominusda uli, alágad sa dakúlang pagtuyátuyá.
"Anó saimo, Doña?" an saiyang hapot.
"Masabihan mo daw, tabi, ako !Señora! kun anó ta siring an paghiling mo sakuyá? Nauri ka?" si Doña
