saíyang túgang, "kun nagtubod ka sakuyá may sanggatós na pisos kutá kita ngunyán: huli saimo dai kita minsán sarong kosing."
Dai nagsimbag si Társilo, kundí nangalagkálag sa saíyang palibot nin mga matang nagboborolákog na baga may hinahanap.
"Hoto nakikipagólay ki Pedro," an sabi pa ni Bruno;"pigtaohán nin kuwarta, !guranong kuwarta!"
Si Lucas man nanggad na nagbibilang nin kuwartang pirak (65-a) sa kamot kan agom ni Sisa. Naghoronhorón pa sa hilom asin nagbulag na garong mga nasesenangan (66-a).
"Hinoron gayod si Pedro: !iyán, iyan an sáyod na natatalaga!" an hagayhay ni Bruno.
Malipungaw man giráray asin baga may iniisip si Társilo; pináhid su daplós sa saíyang ángog kan manggas kan saíyang morona.
"Túgang," an sabi ni Bruno, "aakoon ko na kun dai ka magdesidir: an katogonan iyo man giráray, súkat na gumana an sarab asin dai kita dapat magsáyang nin anó man na bahígay. Muya kong pomosta sa másunod na soltada; anó man? Sa bágay na ini ikakapanghimalos ta su satong amá."
"Halat!" an sabi saiya ni Társilo asin pinotitukan sya sa mata — su duwa magkasi malungsí; — "maiba ako saimo, tamá ka: ipanghihimalos nyató su satong amá."
Alágad ominantoró asin pináhid namán su ganot.
"Anó ta minaantoró ka?" an hapot ni Bruno na dai na nakatíos.
"Aram mo kun anong soltada an másunod? magkakanigó na...?"
"Kun síring, dai! dai mo nádangog? Su bakongon ni Capitán Basilio laban sa sarab ni Capitán Tiago; sunod sa katogonan nin sugal, súkat gumana an sarab."
"Ah, an sarab! Makasar man ako... alágad magpaseguro ngóna kita."
Sa hiró ni Bruno nahihiling na nalalangkag na sya, alágad sominonod sa saíyang túgang asin hiniling nin marhay kaini su lálong, pinagatidátid, naghohorophórop, nagiisipísip, may mga ihinapot, nagduwaduwa an táwong itong makaúgay; ninenerbyos si Bruno asin anggot na hominiling saiya.
"Dai mo nakikita an dakúlang kiskís na iyán sa may
