Mantang itinotogot kan Pamahalaan asin haros pinapudihan (56-a) na ipinagboboot na an borolang gibohon sa publico sa mga aldaw nin fiesta (tanganing makita kan kagabsan asin makasadol an panganinohan?), pakamisa mayor asin sagkod sa pagsinarom (walong horas), maayon kami sa paghanap sa nagkakapirang mga kamidbid.
An bulangan sa San Diego daing kalaenan sa ibang mga bulangan sa ibang mga banwaan kundi lamang sa nagkakapirang bagay. Binibilog nin tolong bahagian (57-a): an énot, okun an linalaogan, sarong dakulang rectagulo na may mga duwang polong metro na laba asin kag-apat man an lakbang; sa saro kan mga lado igwa may bukas na tata, na parating binabantayan nin sarong babayé, na iyong naghahagad kan sa puerta o derecho sa paglaog. Sa ibinabayad na ini nin lambang saro igwa nin kahirasan an Pamahalaan, ginatos na ribong pisos an taon; sabi huli kan kuwartang ini na ibinabayad vicio tanganing pabayaan sana iyan, darakulang paadalan an pinapatirindog, minagibo nin mga tulay asin minabikas nin mga lansangan, minatogdas nin mga pasib (58-a) tanganing magnigos an mga paratanom asin an mga nagngangarakal (59-a) ...! pagomawon logod an vicio na nakatao nin mga marhay na hasil (60-a)! Sa énot na ining bahagian namumugtak su mga paratinda nin buyd, tabako, mga mahamis asin mga korokakanon asin iba pa; nanggogorolimay duman an mga aking lalaki na mga kairiba kan saindang mga magurang na lalaki o kan saindang mga amaon, na hilom sindang sinasanay sa mga hilom nin pagkabuhay.
An bahagian na ini dagos sa sarod pa na dorodakola nin kadikit sarong halatan bilang, na pinagtitiripunan kan mga tawo bago magpoon an mga soltada. Iritoon duman an kadaklan kan mga lalong, na nagkakagarakod sa mga pakong tul-ang okun bahi, mga itoon duman su mga parabolang su may mga kamuyahan, su masayon na magtakod kan bolang; duman nagpoporostahan, duman pinagiisipisip, duman ginibo an pagutang, duman panunumpa, duman na nanaksi, naghahararakhak, ito nagdadagay kan saiyang manok, pinaghahapros su kamot sa makintab na balikag; pinaghihilinghiling kaini asin binibilang su mga kiskis sa bitis; linodsip su mga galing kan mga nandaog; duman
