franciscano asin nagkapirang mga kastilá. Siring man may mga kaibahan pa su cura na an katongdan iyo an pagantabay sa mga fraile.
“!Pagbaralsan man logod sinda nin Dios sa ikaduwang buhay!” an sabi ni gurang Tasio na kanayon ominaliwayway.
Su paluwas pominooón sa ki Chananay asin si Maria nito sa Crispino e la Comare. Gabos may mga mata asin mga talinga sa escenrario maliban sa saró; si Padre Salvi. Garong dai syang ibang tuyo duman kundi an pagbantay ki Maria Clara na an kamondoan minatao sa saiyang kagayonan nin sarong aire na ideal asin sabot na pinaghihilinghiling sya nin magalang na gayo. Alágad su mga mata kan franciscano na nagkakataragong gayo sa kalog na namumugtakan, dai nagsasabi nin panggilantas; sa moninong na itong paghiling may nababásang sarong bagay na makamomondong bulanos! an siring na mga mata ipighilinghiling gayod ni Cain kan Paraiso maghalé sa harayo na su mga kagayagayahan kaito isinaysay gayod saiya kan saiyang ina!
Naghihinanapús su paluwas kan lomaog si Ibarra; an pagkaitoon niya duman naging dahélan nin sarong hiringhingan: su pangataman kan kagabsan nakapako saiya asin sa cura.
Alágad garong dai kaito nagmangno su hagbayon; tara mahusay su pagtaong gálang ki Maria Ciara asin sa saiyang mga amiga, asin tominukaw sa saiyang katáid. An iyo-iyong nagtaram si Sinang
“Naghiling ka kan volcan?” an saiyang hapot.
“Dai, sadit na amiga, kinaipuhan na ibanhan ko su Capitán General.”
“Kanogon pa! kaibahan nyámo su cura, asin pinagosipan kami nin mga osipon dapit sa mga condenado, !mapapaghonáhoná mo.”
Bominuhat su cura asin dinólok si Don Filipo na garong nagkaigwa nin sarong makúring pasuhaysúhay. Halangkaw su tingog kan cura, si Don Filipo matalontagon asin sa habábang tingog.
“Ikinamomondó kong dai nyakó masosonod an Saimong Pagkaigagalang,” an sabi ni Don Filipo; “si Ginoong Ibarra saró sa mga darakúlang parabuhis asin may katanosan na mapadigdi sagkod na dai nya linalaglag an kamoninongan.”
“Bakó daw na paglaglag kan kamoninongan an pag-
