pinangengenotanan nin mga naggugurúbing nin sa fantasma, na nakakapasusto sa mga akí, kun kayá nadangog su hinibí asin kinoragsing nin mga omboy na sarawayon. Alágad sa táhaw kan madiklom na itong pangkat nin mga hábito, mga capucha, mga cordon asin mga toca, sa daging kan pangadyeng itong sarong tingog asin malágong, nakikita síring sa mga maputing jazmin, síring sa labas na mga sampaga sa táhaw nin mga daraan na dugnit, kagduwang (12) áking babaye na mga putí su gúbing, nagkakaporotongan nin mga búrak, mga korong su búhok, masaga su mga paghiling, síring kan saindang mga kulintas; garong mga saradit na genio sa liwanag na makatakottákot na mga nakokolong. Nagkakarapot sa duwang haralakbang na cintas na bughaw na nagkakaborogkos sa carro kan Virgen, na nagpapagiromdom kan mga salampati na nagboborotong kan sa Tigrarámig (8-a). Nangangataman na bulanos su mga ladawan, nagdidinorootan sa paghinanyog kan mga rawitdawit; nakapotítok su mga mata kan kagabsan sa bukás-bukás na tábing; sa katapusan sarong aah! nin pagtaka nakaluwas sa gabós na mga ngosó.
Asin magkakanigong gayo: sarong barobatá na may pakpak, may botas sa pangabayo, may banda, may cinturón asin kaló na may plumaje. "Su Señor Alcalde Mayor!" an kuráhaw nin saró, alágad su ngangalasan kan paglalang (9-a) nagpóon nin paghilwas nin sarong tulá na síring saiya asin dai nalapastanganan kan pagbabagay.
Anó pa ta ibugtak digdi su sinabi sa latín, tagálog asin kastilá, gabós isinatulá kan makauúgay na víctima kan Gubernadorcillo? An samúyang mga parabasa nagkanaragoman na kan sermón ni Padre Dámaso ngunyan na aga, asin dai mi boot na padangaton sinda sa pamamatáhaw nin síring kadakol na mga ngangalasan, laen pa na mangyari na pagkaigwahan kami nin masingpil na boot kan franciscano kun ihánap nyamó sya nin kalaban, asin iyo ini an samong hinaháboan, huli ta nagkapálad kaming máging mga tawong matonínong.
Dangan nagpadagos su procesión; ominagi si San Juan sa dalan nin kapaitan.
Pagtangod kan Virgen sa harong ni Capitán Tiago, pinataratara nin sarong lagitnon na áwit kan mga ta-
