"!Ay abaa ka pangbihira an saímong mga nasa ísip!" an mapanggilantas na sabi ni Capitánang Tínay, na pinagtakop su kamot; "garong daing kolog su pagakí mo kan saímong kambal!"
"Nin huli nganí ta makolog su pagakí ko sainda, pinadarakulá asin pinagarádal ko sinda minsan na nganí dai kaming súkat, habó ko na, pakatapus kan sinápol kong mga kapagalan nagruluwas na mga tawo-tawo lámang.."
"Sa sakong pagloba dai mo minámahal an saímong mga akí síring sa ipinagboot nin Dios!" an sabi ni Hermánang Rufa sa mahorohigpit na tingog.
"Ipagpatawad nindo, lambang iná nagmamahal sa saíyang akí sunod sa saiyang palakaw: an iba nagmamahal sa saindang akí sa sainda, an iba huli sa sainda asin an nagkapira huli sa sainda mansana. Ako nasa bílang kaining huri, itinokdó sakuyá kan sakong agom."
"An gabós mong kaisipan, Capitánang María," an sabi kan Rufa na baga nagpepredicar, "bakong gáyong sa banal: magi kang Hermana kan Santísimo Rosario, ni San Francisco o ni Santa Clara!"
"Hermánang Rufa, kun karapatdapat na akong máging túgang nin mga tawo, pagmamalasakitán kong máging túgang nin mga santos!" an saíyang nakahoyom na simbag.
Sa pagkatapos kan kabtang na ini nin mga sarabisabi, asin tangáning makita kan mga parabasa, minsán sa agi sana, kun anong sa isip kan mga masipag (408) na mga taga oma dapit kaitong nangyari, padumán kita sa plaza, saen may nagoorólay sa tangod kan tolda; "Midbid nyamó an saró sainda, su nangatorogan na magkakaigwa nin sarong akí na doctor sa Medicina."
"An orog nyakong ikinamomondó" an sabi kaini,"iyo na dai mahahamán an paadalan!"
"Paano, paano?" an hapot na bulanos kan mga dudúman.
"Dai na magiging doctor an sakúyang akí, kundi karetonero! Daing anó man lámang! Dai na magkakaigwa nin paadalan!"
"Sabi niisay na dai na magkakaigwa nin paadalan?" an hapot nin sarong kablás na taga omá, salangan asin sadit su bagolbagol.
"!Ako! Si Don Crisóstomo inapod na plibastiero (409) kan mga Páding putí. !Dai na magkakaigwa
