sa tawo kaipuhan man giraray na laenon; itong itinataram ab irato (15). su isinasabing ex ore (16), alagad bakong in corde (17) asin an mga isinasabing in corde. Ining mga nasa huri iyo sana an mga makakataong kahologan sa boot asin sunod naman sa sarong bagay: kun dati nang nasa isip o in mente (18) huli sa sarong dahelan o nakasaliabot sana per accidens (19) sa init kan pag-ordlay, kun igwa...”
“!Tara per accidens, asin sa sako mansana, aram ko an mga dahelan, Padre Sibyla!” an saligbaton kan militar na nakagalabod na sa kadakol na mga pagpapalaen asin nahahandal na kun idagos, maluwas pa siyang igwa nin sala. Natatalastas ko an mga dahelan asin lalaenon an mga iyan kan Saimong Pagkaigagalang. Kan panahon na dai si Fray Damaso sa San Diego, ipinalobong kan coadjutor an bangkay nin sarong tawo na midbid na marhay .. . opo, midbid na marhay, nagkapira ko siya nakaolay asin sa harong niya ako nagdagos. Na dai nagkukumpisal sagkod noarin pa man, ano man kaiyan? Ako ngani dai man nagkukumpisal; alagad sarong kaputikan an pagsabi na naghogot, sarong pagpakaraot... sarong tawong arog saiya, na may aking saro, na tinugsadan niya kan saiyang pagmahal asin pagsarig, tawong may pagtubod sa Dios, na nakakamidbid kan saiyang mga katongdan sa banwaan, sarong tawong may dangog asin sandag (20), dai mahogot. Sinasabi ko iniho, asin hinihilom ko digdi an iba pang iniisip ko asin ipasalamat iyan sakuya kan Saimong Pagkaigagalang.”
Asin, pakatalikondi su franciscano, nagpadagos:
“Tara, an cura na ini, sa saiyang pagbalik sa banwaan, pakatapus na kologon su makauugay na coadjutor niya, ipinakotkot su bangkay asin ipinahalé sa campo santo tanganing ipalobong giraray, inda kun saén. An banwaan nin San Diego sa dai pagsolang kaito, lominuwas na matalaw, totoo ngani na nagkakapira man sana an mga nakakaaram,—su gadan mayong kadugong siisay man, asin ta nasa Europa su saiyang iyoiyong aking lalaki,—alagad naaraman kan Saiyang Kahalangkawan asin, huli ta siya tawong matanos an puso, naghagad nin padusa...... asin si Padre Damaso ilinipat sa sarong lalong marhay na banwaan. Nasabi ko na gabos. Ngunyan gibohon kan Saimong Pagkaigagalang an mga paglaén-laen.”
