Bominuhat su piloto, kominoa nin pising halaba asin maliksing sominakat duman sa garong palapala. Nagpahonod saiya si Leon.
Maliban ki Maria Clara, dai kaito nin nakamangno saiya, ngunyan pinaghihirilinghiling su saiyang lapisayon na panghawak.
Sa dakilang pagtaka asin minsan nagsururiyaw su kagabsan, tominagbang su piloto sa laog kan likos.
“Daraha an cuchillo na ini!” kinurahawan siya ni Crisostomo kanayon gabot nin sarong malapnad na toledano.
Alagad nagboroboro na su tibig katakatakang nagmoninong su kaladman.
“Jesus, Maria y José!” an sabi kan mga babaye. “Magkakaigwa kita nin kapahamakan! Jesus, Maria y José!”
“Hare kamo kahandal, señoras” an sabi kan gurang na banquero; “kun igwa sa bilog na lalawigan nin makagibo nin siring, siya iyan.”
“Siisay ngaran kan hagbayon na iyan,” nagharapot.
“Pigaapod mi siyang piloto; iyo an orog karahay na sakong nakita; iyo sana ta daing pagmahal sa saiyang katongdan.”
Su tibig naghihiro, su tuibig naglilinoklinok, nagboboyogboyog su banata. Daing girirongan su kagabsan pinaporogolan su saindang hinangos. Hinihigotan ni Ibarra nin tinatakigan na kamot su polo kan matarom na cuchillo.
Garong natapus na su pagbabaka. Ominutwal su payo kan hagbayon, na pinataratara nin kururahaw nin kaogmahan; pano nin luhasu mata kan mga babaye.
Kominamang su piloto dara sa kamot su poro kan pisi, asin kan duman na sa palapala, binotong ito.
Bominutwa su halimaw, nasasarongan kan pisi nin makaduwang sakrang sa irarom kan sa enotan na mga bitis. Dakula, siring sa dati nang ipinahayag ni Leon; kurayan, (308), asin sa talodtod may nagtotobong hidyaw na lomot, na sa mga angongolkol iyo an uban kun sa mga tawo. Nagodngal na siring sa vaca, rinarapado kan ikog su banata asin minasoso duman, asin nginanganga su maitom asin makangirirhat na ngosd, na nababantaag su haralabang tingo kaito.
Su piloto lamang an naghihila kaito paitaas dai nin nakaromdom na tumuwang saiya.
