handá sa fiesta daing mga comentarios, na kasabay an
pagngorobngorob.
Alintánang nagiisip sinda kan nagdadangádang na kagayagayahan, su iba pinaglilibak su gobernadorcillo, su iba su teniente mayor, su iba su mga bagong-tawo asin dai nahalean nin nagsabi na ito gabos salá kan kagabsan.
Saindang pinagorolayan su pagdatong ni María Clara, kaibahan si Tía Isabel. Ikinaogma ninda iniho ta minámahal ninda sya (284), asin nawiwili sindang bulanos kan saiyang kagayonan, síring man nagtataka sinda kan mga kabagohan na inaagihan kan pangungugalé ni Padre Salvi.-"parating malibang sa laog kan mahal na átang (285); dai na nagpaparapakihoron satuyá asin háyag an pagníwang asin an pagkabakó nang matináram," an sarabisabi kan saíyang mga penitente. Namamasdan kan cocinero na nagtitios syang magípos asin naghihinanakit (286) ta kadikit lámang an paghahalaga sa saíyang mga lotó. Alágad an orog na pinagngongorobngoroban kan mga tawo iyo an pangyari na labing duwang (2) ílaw an náhiling sa convento kan bangging pagdálaw ni Padre Salvi sa sarong harong na particular... !sa harong ni María Clara! Nangungururus su mga banal, (287) alágad dagos man giráray su saindang mga pagngorobngorob.
Maghalé sa pamayo kan lalawigan si Juan Crisóstomo Ibarra nagpadara nin telegrama na pinangomostahán si Tía Isabel asin su saíyang makoiná, alágad dai nya ipinaliwanag an dahelán kun ngatá ta dai sya. Kadakol kan mga nagloloba na nabibilanggo sya huli kan saíyang ginibo ki Padre Salvi kan hapon kan Todos los Santos. Alágad nagorog su mga orosipósip kan makita sya, pagkahapon kan ikatolong aldaw, na naglugsot sa sarong lunadán sa tangod kan harong kan saíyang magiging agom ngápit asin magálang na pinataratara su religioso (288), na pasíring man dumán (289).
Dai nin naghadit ki Sisa asin sa saíyang mga akí.
Kun pomadumán kita ngunyan sa harong ni María Clara, sarong (1) sálag sa táhaw nin mga lukban asin tanghid, maabtan nyató an duwang (2) bagong-tawo, na itoon sa may dungawan na hampang sa dánaw. Nalilindongan ito (290) nin mga búrak asin mga balagon na nagkakaranap sa mga botong asin mga káwat (291) na mga nagaalimyo nin ági sanang hamot.
