bolod asin mga danaw.”
“May nagkakapirang sombong sakuya laban sa maestrong ini,” an sabi kan Saiyang Kahalangkawan na nagpahinilingan kan si Simoun; “sa paghona ko an marahay suspenderon sya.”
“!Suspendido!” an olit kan kahilom.
Ikinakolog kan boot kan halangkaw na empleado su palad kan makauugay na ito na naghahagad nin tabang suspension an nanapolan asin boot na gomibo saiya nin sarong bagay.
“An cierto,” nagpadamgo nin may kaibang katakutan, “na an pagtokdo daing gayo pinangangataman ...”
“Nagboot na ako nin darakulang halaga na ibabakal nin mga materiales,” an maabhaw na sabi kan Saiyang Kahalangkawan na garo bagang boot nyang ipasabot na: “ginibo ko an labis sa magkakanigo!”
“Alagad huli ta nagkukulang nin tamang mga local, masasayang an mga bakalon na mga materiales.. ”
“Bakong gabos mahihimo sa sararoan sana,” an saligbaton na laghod kan Saiyang Kahalangkawan; “sala an gibo kan mga maestro digdi sa paghagad nin mga gadung kun an mga sa Peninsula nagkakagaradan sa gotom. Kaniguan na kapalabilabihan an pagkamuyang maging orog pa karahay kan sa Inang Banwaan!”
“Filibusterismo.”
“!Enot sa gabos an Bansa! enot sa gabos kita mga kastila!” an dugang ni Ben Zayb na naglalaad su mata nin pagkamakibanwaan asin pominulapula kan makamangno na sya na sanang saro.
“Sa masoned,” an panapus na tataramon kan General, “an gabos na magsombong sususpenderon.”
“Kun akoon an sakong mokna,” nangahas na magsabi si Don Custodio na baga nakikipagolay sa saiyang sadiri.
“Mapadapit sa mga gadung kan mga paadalan?”
“Masipag, mahihimo asin tikis siring sa gabos kong mga mokna, mga gikan sa halawig na kinabatiran asin sa pakamidbid sa bansa. An mga banwaan magkakaigwa nin mga paadalan na dai magastohan minsan sikapat an pamahalaan.”
“Talastas na gayo,” an may pagtuyatuyang simbag kan kahilom; “pinipirit an mga banwaan na patirindogon an mga iyan sa saindang gasto.”
Nagpang-orolok su gabos.
