gad kun an interesado dai ngani nasisibot: naghohoyom-hóyom...
Nasa pagisipisip kan bágay na ini kan lumaog an sarong sorogoón sa pagsabi saiya na boot saiyang makiólay su naghehélang. Bominalyo sa katáid na kuwarto, sarong malinig asin mahayáhay na gáyong lalamban, su mga salog haralakbang asin mga makintab makinang na mga tabla, sangkap na bulanos nin mga darakula asin magagabat na mga sillón, na síring kan su mga kaito, daing barniz, dai man nin dibujo. Igwa sa sarong sógod nin sarong dakúlange kámagong na may apat na harige na tatakodán kan argolla kan kulambo asin, sa kataid sarong dakúlang látok napanó nin mga botella, mga hilo asin mga benda. Sarong látok na reclinatorio sa pamitisan nin sarong Cristo asin sarong biblioteca nakakapagpasahot na iyo ito an lalamban kan padí, na ipinahónod sa saíyang pananawhon, sunod sa filipinong kaugalean na ipahonod sa nakikihimanwa an orog karahay na látok, an orog karahay na lalamban asin an orog karahay na higdaan sa harong. Pagkakítang burukás na gayo su inga bintaná nganing makalaog na bulanos an maginháwang angkas nin dágat asin an mga aniningal kan daing katapusan na inagrángay kaito, dai sa Filipinas nin masabi na duman igwa nin sarong naghehélang, tara kaugalean na pintoon an mga bintaná sagkod an mga ngorongatahal tolos mansanang magkaigwa nin sarong mádakop kan sípon o magakigwa nin daing halagang kolog nin payo.
Huminiling nin pasiring sa cama si Padre Florentino asin sa saíyang dakúlang pagtaka nakita nya na su panglawog kan naghehélang nawaran kan saíyang monínong asin mapagtuyá-tuyang kapahayagan. Sarong hílom na kolog garong nakakapakorondot kan saíyang kíray, sa saiyang paghiling nababasa an kahandalan asin an saiyang ngoso minakipot sa sarong hoyom nin kasakitan.
"Nasasakitan ka Ginóong Simoun?" ab mapagmatong hapot kan padí na kanayon ruminani.
"Iyo, alágad dai mahahaloy dai na ako masasakitan!" nagsimbag na pinaghihiróhiró su payo.
Mangirhat na pinagtakop ni Padre Florentino su saíyang kamot, naghohónang nakasáyod sya sarong katakottakot na katotoohan.
