lang latok na matutukawan nin tolong polo katawo, asin sa palibot, dorokot sa lanob, igwa pang mga saraday, na magkakaturukawan nin duwa asin tolo. Mga sinarapong na burak, mga bantuwag nin mga bungang-kahoy, sa tahaw nin mga cintas asin mga flaw, nagpapakatahob kan mga centro. Su tukawan kan novio may tanda na sarong sanga nin mga rosas, su sa novia, nin mga burak nin lukban asin mga azucena. Sa atubang nin siring kakuring lujo asin sa siring kadakol na mga burak mapapaghona-hona na mga ninfa na maninipis an damit asin mga cupido na may mga pakpak na garong mga kiniso magtataragay nin nectar asin ambrosia sa mga tagadoros na mga pananawhon sa tanog nin mga lira asin mga arpang eolias.
Alagad, dai duman nin latok nin mga darakulang dioses, itoon duman pinaglilingkodan sa tahaw nin malapad na azotea, sa sarong tihantik na kiosko na talagang ginibo sa bagay na ito. Sarmong celosia nin kahoy na dorado, na pinagkakanapan nin mga maalimyong mga tinanom na kanap, nakakatago kan sa laog sa mata kan banwaan dai man nakakaolang kan hiwas na paglibotlibot kan angkas, sa pagingat kan kinakaipuhan na hayahay sa katarahanan na ito. Sarong halangkaw na pasanggan minapaitaas kan latok sa kapantayan nin iba na kakaonan nin mga hamak na tawo, asin sarong takombo, na sinamnohan kan mga orog karahay na mga artista, makakalindong kan mga may kamahalan na mga bonga sa mga maorihon na paghiling kan mga bitoon.
Dai duman nin ibang tukawan kundi pito; su vagilla gadot na pirak, su mantel asin su servilleta linong pinong marhay, su mga arak, su mga orog kamahal asin su mga manag-omon. Hinanap ni Don Timoteo su orog na gayong pambihira asin orog kamahal asin dai mangangalangalang sa atubang nin sarong crimen kun sinabihan na amoma kan Capitan General an carne nin tawo.
- “Magsayaw sa ibubaw nin volcan.”
Pag-ikapitong horas nin banggi nagdadaratong na su mga inanyayahan: su mga harababang mga dios, mga saradit na empleado, mga subordinadong mga opisyal sa pamahalaan, mga escribiente asin mga parakarakal
