tabing-non (404) asin daing duwaduwa na su tagumpay nakapotong kuta sa satong mga pagmalasakit! Alágad dai nin sarong ísip na namuyang omandórog sakúya; tákot asin kaluyahan nin boot natuklasan ko sa mga may halangkaw na adal, kapasloan sa mga mayayaman, pagkadaing pagalamáam sa mga bagong-tawo, asin daing iba kundi sa mga kabukiran, sa mga destierro, sa mga makaúugay natuklasan ko an sakong mga tawohan! Alagad dai bale! kun dai kita makakoa nin sarong haman na estatua, makinang sa gabos na pagkamugtak, su batong magaspang na satong bayaan pamamahalaan kan mga mapadigdi!”
Asin pakakapoti sa takyag si Basilio na naghihimaté saiya na dai na dai nya nasayod gabós, dinara sya sa laboratorio na pinagtatagoan nya kan saiyang mga producto químico.
Sa ibábaw nin sarong lamesa igwa nin dakúlang kajon nin sagrin oskuro, nakakaagid sa mga vajillang pirak na ipinagpaparasibpasiban kan mga mayaman asin kan mga hadé. Binuksan ni Simoun asin nahayag, sa ibabaw nin hapin na pula, an sarong lampara na original na marhay an porma. Su depósito garo sarong granada, dakula siring sa payo nin sarong lalaki, borobarana, nahihiling na garong mga tipasi sa laog, na isinasaladawan nin darakulang cornalina. Su obak bulawan na kalawangon na naaarog nanggad sagkod su mga poropilwang kan bungang-kahoy.
Maingat na gayong kinoa ito ni Simoun, asin pakahalea kan metsa, nahayag su sa laog kan depósito: bakal na may mga duwang centimetro su hibog asin malalaogan nin labing sarong litro. Pinaghahapot ni Basilio kan saiyang paghiling: dai nin anong nasabotan.
Dai nin anó man na mga paliwanag, maingat na gáyong kinoa ni Simoun sa sarong armario an sarong frasco asin ipinahiling sa hagbayon su fórmula na nasusurat sa ibábaw.
“Nitro-glicerina!” an sabi ni Basilio sa hababang tingog, na kanayon sibog na daing ano-ano ihinarayo su kamot. “Nitro-glicerina! Dinamita!”
Kan pinaghohoná nyang nasabutan na nya, nagpanurungkag su saiyang búhok.
“Oho, nitro-glicerina!” luhaylúhay na inolit ni Simoun kaiba an saiyang malipot na hoyom asin mamongáyang pinaghihilinghiling su frascong cristal; “la-
