Custodio na nakalingaw nang lubos kan maraot na boot; “Nawara mo su orog karahay sa paglakbay!”
“Psh!” an simbag ni Simoun na nakasakat na: “nakakita na ako nin dakol na mga tubig asin mga tanawon asin nagkakahalaga na sana sakuya an mga nagpapagiromdom nin mga alimat.(74)”
“Mga alimat, igwa nin nagkakapira an Pasig,” sominimbag su Capitan na habó nyang pagbasangbasangon an salog na saiyang pinagsasakayan asin pinagkokoahan nya kan saiyang pagbuhay; “igwa ka kan su sa Malapad-na-bató, gapong sinanglitan bago dumatong su mga kastila bilang erok kan mga espiritu; dangan, kan malaglag na su anito (75) asin narangsaan su gapo, naging ontokan nin mga tulisan na magpoon sa itaas kaito madaleng nabibihag an mga makauugnay na mga banka (76) na nakikipagbaka sa solog asin sa mga tawo. Dangan pa kaiyan, sa panahon nyato, sa kasakitan nin tawo na nagbugtak duman kan saiyang kamot, sinasambit ini o an osipon na ito dapit sa nabalitwang banka asin kun ako sa pagliko kaiyan dai ko gamiton an sakong anom na pakamaté, makakabangga ako sa kagigiran kaiyan. Igwa ka nin saró pang alimat, su sa cueva ni Dona Jerénima na ikakaosipon saindo ni Padre Florentino....”
“!An gabos nakaaram kaiyan!” an mapag-ologolog na saligbaton ni Padre Sibyla.
Alagad maging si Simoun, maging si Ben Zayb, maging si Padre Irene, maging si Padre Camorra mga dai tatao kaito asin hinagad ninda su osipon (77) su iba sa pagpangisi lamang asin su iba sa pagkamuyang gayong makaaram. Su elérigo, sa mapagpangisi man na tingog siring sa paghagad kaito kan iba, siring sa gurang na paratokdó na nagoosipon sa mga aki nagsabi.
“Saró syang estudiante na nangakong magpakasal sa sarong daraga sa saiyang bansá na garong dai na nya naromdoman liwat. Sya (78), dayupot, nagparahalat saiya sa halawig na mga taon; nakalihis su saiyang pagkaaki, ominimyos asin sarong aldaw nabaretaan na su dati nyang katipan arzobispo sa Manila. Nagbalatkayo nin sa lalaki, ominagi sa Cabo asin ominatubang sa Saiyang Kaliwanagan na gayo (79) asin naghagad na otobón su panuga saiya. Dai sa pagkahimo su pinaghahagad asin ta kun siring nagboot su arzobispo nagboot na andamon su cueva na saindo gayod na nakita linanoban
