242
mga cuadro, pinagbabasa su lista kan mga precio. Su iba nagoorolay kan pinagoorolayan kan aldaw na ito, kan mga actres kan opereta francesa asin kan makagigilantas na helang ni Simoun na, sabi kan iba, naabtan ninda sa langsangan lugad, olay man kan iba, naghohogot: siring sa talagang mangyayari; nagpurawas an bagay na ini sa mga bana-bana. Laen man su bareta ni Tadeo, sabi, kinoa nya sa marhay na burabod baga bilang. Si Simoun binagat nin sarong dai midbid sa daan na plaza del Vivac; an dahelan panghihimalos, asin bilang katibayan si Simoun mansana habong magtao nin pinakadiit na paliwanag. Pakatapus kaito, pinaghororonan an mga dai masayod na mga panghimalos, asin katalagahan na gayo na maorawihan an mga sa fraileng kadasigan lambang saro nagosip nin gibong mabansay kan cura asin lambang saro sa balang banwaan.
Sarong versong cuarteta, na nasusurat sa mga darakula asin mga maitom na titik, nakakapotong sa itaas kan nangongorog na tata kan bidang asin nagsasabi:
An kagrogaring na parapansit
Sa mga suki nagpapatanid,
Na sa latok, sa silla na hayag,
Daing anong ipagwalat.
“Abobo nang patanid iyan!” an hagayhay ni Sandoval; “nagpapahiling nin pagtiwala sa pangkat (369), eh? Asin ano nang verso iyan! Si Don Tiburcio naging redondilla, duwang bitis, su saro halaba sa saro, sa tahaw nin duwang muleta! Kun makita ni Isagani, ipapasib sa magigi nyang inaon!” (370)
“Uya si Isagani!” an simbag nin sarong tingog maghale sa hagyan.
Asin tominonga su mapalad na hagbayon na nagsasaga sa kaogmahan, kasonod an duwang intsik na huruba na magkasi may dara sa darakulang bandeja nin mga loto na nagwawagas nin nakakapaganang parong. Pinataratara an mga ito nin mga maogmang mga hagayhay.
Dai pa si Juanito, alagad huli ta nakalihis na su horas, maorogmang nagpanukaw sa latok. Sa giraray maluwas na daing kapormalan si Juanito.
“Kun si Basilio kuta, bakong sya, an satong inanyayahan,” sabi ni Tadeo, “lalo kitang makakaaraling. Buburaton nyato sya tanganing makoahan ta nin mga
