“Alagad, anong saimo ngunyan ta manglalaban ka?” an hapot ni Basilio.
“Mayo, inda; alagad pinangingirhat ako kan tawong iyan, haros natatakot ako.”
“Pinagsisikmol taka; dai mo aram na ini pinagaapod na Cardenal Kayumanggi?” (55)
“Cardenal Kayumanggi?”
“0 Maitom na Kahalangkawan (56), siring sa muya mo.”
“Dai ko ika masabotan!”
“Si Richelieu (57), may hapotan kaitong capuchino na pinagaapod na Kahalangkawan na Abohon (58); tara ini sa General. . .”(59)
“Totoo?”
“May nadanggan ako kaiyan... sa likod sa giraray naglilibak saiya (60), asin iniilay (61) sya sa atubangan.”
“Naggigian man ki Capitan Tiago?”
“Magpoon kan enot na aldaw kan saiyang pagdatong, asin sayod na gayo na ibinibilang syang kaagaw. .. sa panonod.. . Asin sa paghona ko makikipagkita sa General mapadapit sa pagtokdo nin kastila.”
Kan horas na ito ominabot an sarong sorogoon sa pagsabi ki Isagani na pigapod sya kan saiyang amaon. Sa saro kan mga bangko sa dolon asin kasaralak kan ibang mga sakay nagtutukaw an sarong clerigo (62) naghihiling kan tanawon na pasonodsonod na minaladlad sa saiyang paghiling. Tinataohan sya nin matutukawan kan saiyang mga kataraid, su mga lalaki, kun minalabay sa harani, minatorokas kan kalo asin su mga parasugal dai nangangarahas na ibugtak su saindang lamesa sa harani kan saiyang namumugtakan. Kadikit na magtaraman an pading ito, dai nagsisigarilio, dai man minapahiling nin mapaghambog na gawe, dai nya ikinasosopog na makipagsalaksalak sa iba asin pinapasalamatan an mga itinataong kagalangan may kaibang kapinuhan asin kabansayan na baga nakakamapinapadanggan sya nin marhay asin minimidbid na bulanos. May pagka tawo na, haros mapuputi na su buhok, ala gad garong maginhawa pa syang marhay, asin minsan nagtutukaw, mabaskog su lawas asin tanos su payo, ala gad daing kaabhawan asin daing kapangahasan. Napapapalaen sa pangkat nin mga pading indio, kadikit, na gayo, na kan mga panahon na ito mga naglilingkod na
