noyos sa saiyang karigonan! Kun an sarong banwaan dai makapagdolot sa saiyang mga virgen nin sarong moninong na pagsadiri, sa pagampon kan sinanglitan na pakahiwas; kun panghihimula sana an ikakapamana nin lalaki sa babayeng balo, mga luha sa ina asin pagkaoripon sa mga aking lalaki, marahay an saindong gibo sa pagsilot nindo sa saindong sadiri na magdanay sa daing katapusan na kabinian, linalamos nindo sa laog kan saindong ginhawa an banhi nin sinumpaan na mga ipangangaki ngapit! Ah, marhay ka ta dai ka mangingibigkibig sa saimong linobngan sa pagdangog kan gasod kan mga naghihingagdan sa kadikloman, kan mga nagmamateng igwang pakpak asin nagkakataralikala, nin mga nagkakaralamos sa kakulangan nin pakahiwas! Lakaw, lakaw sa kaibahan kan mga pangatorogan kan mga tagapagawit sa rona nin daing sokol, anino nin babaye na naanilag sa siring nin tala-sinag, ipinaghahaginghing nin mga honodhonod na mga sanga nin kabotongan... Mamongaya an babayeng nagagadan na pinagtangisan, an minawdalat sa puso kan namomoot saiya nin sarong malinig na vision, sarong banal na giromdom, dai nadigtaan nin mga dustang pakamaté na pinapaosbog kan mga taon! Hilinga, ipinapagiromdom nyamo saimo! Sa dalisay an angkas kan satuyang bansa, sa tongod kan saiyang bughaw na langit, sa mga alon kan danaw na nabibilanggo nin mga bolod na zafiro asin nin mga pangpang na esmeralda; sa saiyang mga gabobog na mga sapa na nalilindongan nin botong, binobordahan kan mga burak asin binobuhay baga bilang kan mga atibagros asin mga kalibangbang kan saindang nangangalangalang asin mga kapritsong layog na baga nakikipagkarawat sa angkas; sa kamoninongan kan satong mga kadlagan, sa awit kan satong mga sapa, sa oran nin mga brillante kan satong mga busay, sa masagang liwanag kan satong tala-sinag, sa mga hagayhay kan simuy kun banggi, gabos nagpapagiromdom kan banding kan namomotan, makikita ka nyamo sagkod noarin pa man siring kan samuyang pagpangatorogani saimo, mabahan, magayon, naghohoyomhoyom siring kan pagsirig, dalisay siring sa liwanag, alagad, mamondo asin malipungaw sa paghilinghiling kan satong mga pagtios!”
