Fernando asin kan dai sya makasumpong nin dumagat na katood pinagmarhay nyang umoli. Asin nin huli ta marayrahay su kabanggihon asin su tala-sinag nagbabanaag sa langit na binaliw su makauugay na lungsod sa sarong dakulaon na gayong kahadean nin mga diwata, napaduman sa feria. Duman nagparabalikbalik sya, linibot nya su mga tinda na dai lamang hiniling su mga barakalon, su isip nasa Hong Kong tanganing mabuhay na talingkas, magyaman...
Mahale na kuta sa feria, kan sa paghona nya saiyang nasinawsinawan su joyerong si Simoun na nagpaaram sa sarong daple asin nagoolay-olay su duwa sa tataramon na ingles. Sa ki Placido, an gabos na horon na pigtataram sa Filipinas kan mga europeo, na bakong an kastila, dapat ingles: saro pa, nahopol kan satong hagbayon an katagang Hong Kong.
Kun ikapagpudihan sya kan joyerong si Simoun sa dayuhan na ito na alonggating matulak pa Hong Kong!
Ominantoro si Placido. Midbid nya su joyero ta napaduman sa saiyang banwaan nagbalidya nin mga alahas. Nagiba sya kaini sa sarong paglakbay asin tunay na gayong nagpahiling na mapagmahal na gayo si Simoun saiya sa pagbareta saiya kan pagkabuhay sa mga Universidad nin mga bansang hiwas: abaang kalaenan! Sinonod ni Placido su joyero.
“Ginoong Simoun, Ginoong Simoun!” an sabi.
Kan hidaleng ito tisasakat sa sarong lunadan su joyero. Ominantoro kan mamidbidan si Simoun.
“Muya kong humagad saimo nin sarong utang-naboot..., sumabi saimo nin duwang kataga!” an sabi.
Si Simoun hominiro nin hirong nagpapahiling nin kapawotan, na dai namangnohan ni Placido huli sa saiyang karibarangan. Sa kadikit na mga kataga iinosip kan hagbayon su nangyari saiya ipinahayag nya su saiyang horot na magduman sa Hong Kong.
“Huli sa ano?” an hapot ni Simoun na pinotitokan na gayo si Placido huli sa saiyang bughaw na salming-samata.
Dai nagsimbag si Placido. Dangan itinongkahal ni Simoun su saiyang payo, hominoyom kan saiyang daing girong asin malipot na hoyom asin sinabihan si Placido:
“Marhay! omiba ka sakuya. Sa calzada del Iris!” sabi sa cochero.
