nolok sa lamesa asin binuhat su yamit; dai nin ano pa man, sa giraray dai nin ano man lamang (263).
Kan sominonod na aldaw sominurat nin sarong karangan (264) dapit sa mga hilom na kadonongan, dapit sa espiritismo asin iba pa; ominabot tolos mansana an sarong pagboot kan gobernador eclesiastico na sinasagpong su paluwas, alagad nawara na si Mr. Leeds dara sa Hong Kong su saiyang tagong-hilom.
Si Placido Penitente lominuwas sa clase tagob su puso nin apdo asin malipungaw na mga luha sa saiyang mga mata. Karapatdapat sya kan saiyang pagngaran kun dai sya pinapainit, alagad kun nabubuwangan, sarong tunay nanggad na agos, sarong halimaw na mapopogol lamang sa pagkagadan asin sa pakagadan. An siring kadakol na mga paglalapastang, an siring na mga todok nin alfiler sa aroaldaw, nakapanakig sa saiyang puso ibinugtak sa saiya sa pagkatorog kan pangatorogan nin natotorog na mga sawa, nagbabarangon na ngunyan asin nagboboroyogboyog na nagoorongal sa kaangotan. Su mga siwik nagdadaraging sa saiyang pagdangog kaiba an mapagtuya-tuyang mga kataga nin tataramon kan catedratico, mga kataga nin tataramon sa horon na sinasabing lengua de tienda, asin garo syang nakakadangog nin mga hinagapus nin latigo asin mga harakhak. Sangribong kaisipan nin panghimalos minabarangon sa saiyang hotok nagbabaranggaan asin tolostolos nagkakawarara siring sa mga banding nin sarong pangatorogan. An saiyang pagkamoot sa sadiri kaiba an pangongotiil nin sarong nadaihan na nin pagsarig nagkukurahaw saiya na sukat syang magpadagos.
“Placido Penitente,” an sabi kan tingog, “ipakita sa bilog na pagkabagong-tawong iyan na igwa kang karapatan, na aki ka nin sarong lalawigan na madasig asin maginoo saen an paglanghad hinohugasan nin dugo. Batangueno ka, Placido Pentente! Manghimalos ka, Placido Penitente!”
Asin su hagbayon nagoongal asin nagraragot su saiyang ngipon asin gabos nakakabanggaan nya sa lansangan, sa tulay nin Espana, na baga naghahanap nin
