ta dai inako ta bakong siring kainiho!”
Asin inolit an siring mansanang hiro kan saiyang mga kaniot, kominirogkirog, hiniling su kagabsan na baga saiyang pinagsasabihan: “Nakakita na kamo nin siring na kapahamakan?”
“Asin mahimo daw na maaraman kun ano an minabilog kaiyan?” — Asin... — “!Tara!” an sabi kan lambang saro na dominolok asin handa sa paghinanyog. An mga mokna ni Don Custodio mga bantog siring kan mga belong nin mga parabolong na bako man na mga doctor.
Dai kuta sainda isasabi ni Don Custodio kun ano an minabilog kaito, ta makolog su boot ta dai nakasompong nin kaapil kan nakikipagsuhay sya ki Simoun. “Kun dai nin panganib boot nindo na magtaram ako, ah? asin kun igwa dai kamo nagpapakatigmok?” tisasabi kuta, kundi pagsayang lamang nin sarong marhay na bahigay (37) asin su mokna mantang dai mahimo, mamidbiran lamang asin pangalasan.
Pakatapus nin duwa o tolong paluwas nin aso, nin pagabo asin nin paglutab sa lutaban, hinapot si Ben Zayb na tinaptap sa tangolan:
“Nakakita ika nin mga damolog?” (38)
“Sa paghona ko nakabadil kami kan mga iyan sa danaw,” nagtatakang nagsimbag si Ben Zayb.
“Bako, bakong mga damolog an pigsasabi ko, kundi talagang mga pato na mga garo, su mga pinagaarataman sa Pateros asin sa Pasig. Asin aram mo kun ano an pigtutuka kan mga iyan?”
Si Ben Zayb, iyoiyong payong nagiisip, dai kaito nakakaaram: dai nya pinanonongod an saiyang sadiri sa karadyanan (39) sa karadyanan na siring. (40)
“Mga saradit na mga gulingguling, tawo, mga saradit na mga gulingguling I” an simbag ni Padre Camorra; “dai kaipuhan na an saro maging indio tanganing makaaram kaiyan!”
“Talaga, mga saradit na gulingguling!” an saligbaton ni Don Custodio na ilinamano su toldo; “asin aram mo kun saen pinagkokoa an mga iyan?”
Dai ito aram kan mapagisip na payo.
“Kun igwa ka na nin halawig na mga taon sa kaporoan, matatalastas mo na sa baybayon mansana pinagdadakop an mga iyan, saen nagsasarawa kasaralbog kan basod.”
