kaya sa bilog na conciencia ipinanongod dunian kan maugayon na catedratico su saiyang sadiri na inolit sa luhayluhay su hapot:
“Sabi kan libro, na an mga espejong metal binibilog kan laton o nin sarong aleacion nin manlaenlaen na mga metal, cierto ini o bakong cierto?”
“Sinasabi kan libro, Padre..."
“Liber dixit ergo ita est (211) dai ka magsasagin na lalong tatao pa sa libro...” Dangan nagdugang pa na an mga espejong cristal binibilog nin sarong lamina nin cristal na an duwang superficie makinangon na marhay, sa saro kan mga ini nadodokot an sarong amalgama nin timga; nota bene, amalgama nin timga. Cierto daw ini?”
“Kun sinasabi kan libro, Padre...”
“An timga sarong metal?”
“Garong iyo, Padre: iyong sabi kan libro...”
“lyo, iyo, asin an boot sabihon kan tataramon na amalgama na kasalak kan mercurio na saro man na metal. Ergo an sarong espejo na cristal sarong espejo na metal; ergo makalilibong an mga termino kan division, ergo may kakundian an clasificacion, ergo... paanong pagpaliwanag mo, paratahing espiritu?”
Asin tinatandaan su mga ergo asin su mga mo nin dai masabing pangongorondot asin nagkikiyat na baga nagsasabing: “napritos ka!”
“Huli ta... an boot sabihon...” naghihiraw-od si Placido.
“An boot sabihon iyo na dai ka nakasabot kan leccion, espiritung meskino na dai ka nakasabot asin nagpapasunod ka sa saimong kataid!” Dai nadagit su clase, ata ngani nasompongan nin kadaklan na makangingisi su kataga asin nagpangorolok. Nanggoop si Placido.
“Siisay ngaran mo?” hinapot sya kan catedratico.
May pagkarorolaghod su simbag ni Placido.
“Aha! Placido Penitente, tara lalong garo kang Placido Sopla o Soplado. Alagad bubugtakan ko ika nin padusa kan saimong mga kasopladohan.”
Asin mamongaya huli kan pagkasorosaralbog nin mga kataga, pinagbotan sya na sabihon su leccion. Su hagbayon, sa siring na kamugtakan kan saiyang pagisip, nakaginibo nin tolong kamalean. Su catedratico kun siring nagtatangotango, luhayluhay na binuka su lista
