ngaran kan fraileng-artillero); an karatan na sa danaw... ”
“Huli ta dai nin marhay na danaw sa kaporoan na ini,” an saligbaton ni Dona Victorina, na talagang baldi asin masalakay na naman sa langtad nin labanan. Mangirhat na nagpahirilingan su mga ginorubat asin, sa rikas nin sarong general, ominagap su joyero na si Simoun:
“Libyanong marhay an bolong,” an sabi sa sarong tingog na pambihirang gayo, salbog nin ingles asin americano sa Habagatan; “asin dai ko maaraman na padagos kun ano ta dai lamang ini naisipan nin siisay man.”
Suminaralingoy su kagabsan, pati su dominico, asin naghirinanyog saiya. Su hagbayon na joyero, sarong tawong dai naghohoyom, halangkaw, posog, kayumanggihon na gayo, sa ingles su panggubingan asin nakakopya nin timsim. Nakakaapod kan pangataman an saiyang halaba asin mapuputi nang buhok na minalataw sa barabas na itom, manipis, nagpapahayag nin mestisong gikan. Tanganing dai sya masurian kan saldang, danay na naggagamit nin dakulang salming sa mata na bughaw, na may mga rejas-rejas na saradit, na nakakatagong gayo kan saiyang mga mata. Danay syang tindog, bika na baga naghihinimbang, nakokoot su kamot sa mga borobolsa kan saiyang chaqueta.
“Masipag (17) na marhay an bolong,” an saiyang olit, “asin dai maghahalaga nin binting! (18)” Nagorog na gayo su pangataman. Pinagsasabi sa mga torotiripon sa Manila na pinagbobotan kan tawong ito su General asin nakikita na kan kagabsan na naghaharani nang gibohon su palakaw. Bominirik si Don Custodio mansana.
“Kumali nin tanos magpoon sa orok sagkod sa pagsabangan kan salog, agi sa Manila, kun sa pagkasayod, kumali nin maagihan nin bagong salog asin sagopon an dating Pasig. Makakatikis nin daga, magogotos an mga comunicacion, mapopogol an pagkaigwa nin mga haralangkaw na pangpang!”
Su mokna nakaparibok haros sa kagabsan na mga dating torood sa mga bakong mapait na bolong.
“!Sa yankee na mokna (19)!” an saligbaton ni Ben-Zayb na boot maoyayahan si Simoun. “An sinabing joyero haloy na panahon sa America del Norte.”
