“Pinakiolayan ko ika manongod kainiho, mayamanon na marhay... ipinakikimaherak na bulanos iniho kan señora condesa.”
“Ah!”
“Sarong nagaadal sa Medicina, sarong an pagngaran si Basilio...”
“Dai akong sinasabing ano man dapit sa Basiliong iniho,” an simbag ni Padre Irene na initaas su kamot asin binuka na baga masabi nin dominus vobiscum; ini sa sako sarong mahimong na tubig. Dai ko sagkod naaraman kun anong muya asin kun anong iniisip. !Kanogon pa na dai si Padre Salvi napagosipan kuta kita nin mga mapadapit sa mga enot nyang pagkabuhay! Sa paghona ko nakadangog ako na sabi kan saday pa nakaiwal su Guardia Civil... su saiyang ama nagadan sa sarong baralbalan na dai ko nagiromdoman. . . ”
Maluhayluhay na hominoyom si Simoun, daing ribok, nahiling su mga mapuputi asin mga marayrahay na pagkataraytay kan saiyang ngipon ...
“Aha! aha!” an sabi kan Saiyang Kahalangkawan na nagtatango-tango: “diyata iyan an mga satuya? Isurat mo an ngaran na iyan!”
“Alagad, sakuyang General,” an sabi kan halangkaw na empleado kan makita nyang nagraraot su lakaw kan bagay na ito; “sagkod ngunyan dai pang sayod na batid dapit sa mga hagbayon na iyan; matanos na gayo an saindang hinahagad, asin dai kita nin ano man na katanosan sa dai pagtogot kaiyan na iyo ta lamang pinangangabitan an mga bana-bana. An sakong ganan iyo na an pamahalaan sa pagtao nin katibayan kan saiyang paniwala sa banwaan asin sa kadanayan kan saiyang tugsaran, omoyon sa hinahagad saiya; asin iligtas sya pakabawia kan kapahintogotan kun makita na pinagaabusohan an saiyang pagkamarhayon. Dai magkukulang nin mga dahelan asin mga pasarahotan, mapapagbantayan nyato sinda... Ano ta pamondoon ta an nagkapirang hagbayon na ngapit mangyaring magkorolog an boot, kun an saindang hinahagad ipinagboboot kan mga sa hadeng kapagbootan?”
Si Padre Irene, si Don Custodio asin si Padre Fernan dez nag-oroyon sa pamamatahaw kan saindang payo.
“Alagad dai sukat magpakaaram nin kastila an mga indio, aram mo?” kominorahaw si Padre Camorra; “dai dapat magpakaaram ta ngapit malaog sa pakipag-
