“Dai pa senor, dai senor,” kominurahaw si Don Custodio na nakologan asin namula; “tirindog an mga gadung asin naghaharalat na sanang garamiton. Mga malinig, dai na madugangan pa an pagkapakarhay, mga mahiwas...”
Nagpahinirilingan su mga fraile na may kaibang pagkarororibaraw. Imokna daw ni Don Custodio na gibohon na mga paadalan an mga simbahan asin an mga convento o mga casa parroquial?
“Hilingon ta,” an sabi kan General na kominorondot.
“Tara, sakong General, masipag na gayo,” an simbag ni Don Custodio na nanghonathonat asin pinaluwas su tingog na daing mga soroceremonias; “an mga paadalan burukas sana sa mga aldaw nin toklos, asin an mga bulangan sa mga aldaw nin fiesta ... Kun siring, gibohon na mga paadalan an mga bolangan, minsan na lamang sa laog kan semana.”
“!Tawo, tawo, tawo!”
“Nagluwas na ito!”
“Alagad, anong mga sa isip mo, Don Custodio!”
“Hilinga ang moknang iyan, may gracia!
“Pigdadaogdaog kaini an gabos!”
“Alagad, mga ginoo,” kominagrat si Don Custodio kan madangog nya an siring na mga hagayhay; “magi kitang mga practice, arin na local an angay na gayo kun bakong an mga bulangan? Darakula, marayrahay an pagkagibo, asin mapanumpa sa ginagamitan kan mga iyan sa laog kan semana. Pati ngani sa sarong paghiling, an sakong mokna mangyaring maako: magagamit na bilang linigan asin bayadan nin mga sala sorosemana kan simbahan nin sugal, sabihon ta nin siring.”
“Alagad kun minsan may borolang sa laog kan semana,” an pahayag ni Padre Camorra, “asin bakong matanos na mga contratista sa mga bolangan nagbabayad sa pamahalaan ...”
“ !Ahay! sa mga aldaw na iyan pinipinto an paadalan!”
“Lalaki, lalaki!” sabi kan Capitan General na naeskandalisar; “an siring na kangirhatan dai mangyayari sagkod na ako an nagkakapot kan pamahalaan! Pintoan an mga paadalan ta nagsusurugal! Lalaki, lalaki, lalaki, idadata ko ngona an sakong pagbutas sa katongdan!”
Asin su Saiyang Kahalangkawan tunay man nanggad na eskandalisado.
“Alagad, sakuyang General, orog pa karahay na pin-
