saindang kasal, salamat sa mga makasalan na hamot, nahimo nyang mabaliw sa luhayluhay, mala ta sa hidaleng ini dai manonodan ni Quatrefages asin ni Virchow kun saen sya ibibilang sa mga lahing midbid. Pagkaayaw nin halawig na mga taon magpoon kan sinda nakasal, su saiyang agom na nakapagtios saiya nin resignation nin sarong fakir (11) na minapasakop sa gabos nyang mga pagboot, nagkaigwa nin kaposokan sa laog nin kaglimang minuto, asin binadolan syang marhay kan saiyang pilay na muleta. An pagtaka kan Señora Joba sa atubang nin sarongat na pangungugale dai nakahimo na dai tolos makamangno kan madaleng kinaluwasan asin kan maulian sa pagkatikbahi asin kan dumulag su saiyang agom, nakamate nin kolog asin ta hominigda sa laog nin nagkapirang aldaw sa dakulang kaogmahan ni Paulita, na muyahon na magngisi asin magtuya-tuya sa saiyang inaon. Kun manongod sa agom na lalaki, natikbahan ini kan saiyang gibong bakong marhay na sa saiyang pagloba sarong mangirhat na pakagadan sa agom, inoosig kan inaapod nin sa magagom na kaanggotan (su duwang ido asin su loro sa harong) marikas na gayong dominolag siring sa makakaya kan saiyang kapilayan, sominakat sa enot na lunadan na saiyang nasompongan, nagdagos sa sakayan na enot nyang nakita sa salog, asin bilang Ulises na Filipino, nagwardiwardi sa lambang banwaan, sa lambang lalawigan, sa lambang poro, lamag-lamag kan saiyang Calipso (12) na may quevedo, na nababaldi sa kiisay man na nagkakaigwa nin maraot na palad na makasabay nya sa paglakbay. May bareta na itoon sya sa lalawigan nin La Laguna, nagtatago sa sarong banwaan, asin napaduman sya (13) sa paglomay saiya kan saiyang tininang buhok.
Nag-inarapilan su mga sakay tanganing ilaban an sadiri, nasa-laog sinda nin sarong maogmang orolay, na pinagpapasuruhayan ninda ano man na bagay. Sa mga hidaleng ito huli sa pasiko-siko kan salog, pinagorolayan an paghirahay kaito (14), asin sayod na mapadapit sa Obras del Puerto.
Si Ben-Zayb, su manunurat na pandok ki fraile, nakipagsuhay sa sarong aki pang religioso na sa artillero an panglawog. Magkasi nagkukurahaw, magkasi naglilingadlingad, iniitaas su saindang mga takyag, binobuka su saindang mga kamot, nangagkokompag, pinag-
