Pahina:Bareta-dapit-can-volcan-mayong-sa-albay-can-junio-de-1897.pdf/15

—13—

asin pahiuasa simong honahona,
canogon can simong nasayang na luhá.

Condi ano g̃naya, ica co ibanhon
lomiuanag sana na dai nang diclom,
asin hanapon ta namótan mong agom
sagcod sa aqui co solterong hagbayon.

Ipagpadigdi co can banguing deshoras,
dai nin pagdangan bilog na magdamlag;
daog pang nabagbag sa lauod nin dagat
can labing pagtios mag̃na tauong dulag.

Can Jueves na idto bilog na maghapon,
mag̃na cadicloman garong cabanguihon;
con caya balaquid mag̃na nariribong
sa pagdulag ninda baybay na inoson.

An iba-iba pa na modong pagdulag
can taga-Legaspi sacong italastas;
à fuera caidtong dai co siasat,
alag̃nan na gayo icapagpahayag.

Si nag̃nag̃nabayo dai co macuenta
na con pirang polò cabayong may carga;
ta sa sarong hayop mag̃na apat, lima
aqui ta magurang, pasiring sa banua.

Igua sa pababa, iguang sa carreton
mag̃na mag-araquí asin mag-aragom,
gurâno man gayod mag̃na pagcatagom,
damulag nalocso sa cosog nin pacol.

An iba sainda nag̃nagsasaracay
na masqui bacó niang sadiring sacayan,
malonad na sana macadulag lamang
sa cosog nin oson na nagdadag̃nadang.

Ta mala pa g̃nani nangyari caidto
sa sarong principal iyo si D. Bruno,
si tinagorhaman na sarong baloto,
nauará na basang con baga napáno.