Pahina:Bareta-dapit-can-volcan-mayong-sa-albay-can-junio-de-1897.pdf/13

—11—

sa cosog nin diclom daing pacamaan,
mag̃na pag-iriba nagcacasuruhay.

An mag̃na pag-iyac, tatay co, haen ca,
siring man si nanay di co naquiquita,
sacong mag̃na bitis nagcarologad na
nin pagparahanap sa saindong dua.

Ninsi domatong na sa banuang Legaspi
an cabalaquidan na nagpapa-ili,
mag̃na caharog̃nan soot nin macuri
cadtong mag̃na tauong nag̃nagpacalibre.

Sa lambang banuaan masayonan sana
duman napa-ili can pagdulag ninda,
poon sa Legaspi, Albay y Cagsaua,
sagcod sa Camalig ó mag̃na visita.

Cadaclan na tauo na daing pag-ontoc
humilig, sumacat, macuri an sibot:
si dinatg̃nan asin si bagong omabot,
siring na sa ribong huling natatacot.

Lugar ma-estimar sa bagong domatong
iyo man paghalé masiring sa ibong;
ta namâ, con g̃naya, digdi pa aboton
mahibog na baybay na halê qui Mayong.

Di haros an tauo mag̃na dating dulág,
dai nag-oodong nin quinalagcalag;
lugar pahig̃nalo caidtong pagsacat,
mahilig na naman sa belod tomocad.

An ibang magurang pag-abot sa banua
nag̃nagsosorosog sa aquing caiba,
mag̃na mag-aragom ay, siring man sana
nag̃nagcasuruhay can pagdulag ninda.

Dai nag-oodong nin biniricbiric,
ó tinarotanao, nagsosorósirip:
lambang caharog̃nan sumacat, humilig;
dai nag-oontoc nin binalicbalic.