na negosyo manungod sa mga kasangkapang pangpubliko kaipuhan itao segun sa paagi nin sosyo sa kapital, asin an mga mamamayo sagkod mga opisyal na nagpapalakaw kan nasabing korporasyon o asosasyon kaipuhan syudadanong Pilipino.
Sek. 12. An Estado kaipuhan pauswagon asin tawan nin preperensya sa paggamit nin trabahador na Pilipino, mga domestikong kasangkapan, sagkod mga produktong lokal asin magadaptar nin mga reglamento tanganing magin marhay na pakikumpetensya kaini.
Sek. 13. An Estado kaipuhan magmawot nin sarong paagi sa negosyo na magseserbi sa karahayan kan kagabsan asin gamiton an gabos na porma asin reglamento sa pakinegosyo segun sa paaging pantay-pantay asin patas.
Sek. 14. An sustenidong pagpauswag sa sarong reserbwer nin mga talentong nasyonal na kompwesto kan mga syentipikong Pilipino, mga negosyante, mga propesyonal, mga manedyer, mga haralangkaw an kalidad na trabahong teknikal asin an mga batikanong trabahador asin artisanos sa gabos na obras kaipuhan enganyaron kan Estado. Kaipuhan ipasunod kan Estado an tamang teknolohiya asin manteniron an paggamit kan teknolohiya para sa benepisyong nasyonal. An pagpraktis kan gabos na propesyon sa Pilipinas kaipuhan ilimitar sa mga syudadanong Pilipino, apwera sana sa mga kasong itinatao kan ley.
Sek. 15. An Kongreso kaipuhan magmukna nin ahensya na maga-aserkaso sa pagkaigwa asin pagdakol nin mga kooperatiba bilang mga instrumento sa pagkaigwa nin hustisyang sosyal asin kauswagang ekonomiko.
Sek. 16. An Kongreso dai kaipuhan, apwera sa ley heneral, magmukna nin ley para sa pagpormar, pag-organisar, o mga reglamento nin mga pribadong korporasyon. An mga korporasyon na sadiri o kontrolado nin gobyerno pwedeng maggibo o magestablisar sa paagi nin mga espesyal na karta para sa interes sagkod karahayan nin gabos asin paagihon sa pagprobar nin praktikong ekonomya.
Sek. 17. An Estado, sa mga panahon nin emerhensya nasyonal, para sa interes publiko, durante kan emerhensya asin sa laog kan mga resonableng termino na pigboboot kaini, pwedeng iyo an temporaryong makapot o magpalakaw kan arin man na kagamitang pampubliko asin iba pang negosyong pribado.
