Sek. 11. Tinatawan nin importansya kan Estado an dignidad kan kada tawo asin ginagarantyahan an lubos na paggalang sa mga poder kan tawo.
Sek. 12. Minimidbid kan Estado an kabanalan kan buhay kan pamilya asin kaipuhan atamanon asin pakusugon an pamilya bilang sarong sandalan na institusyon na pan-sosyedad. Kaipuhan kaini atamanon pareho an buhay kan ina asin an buhay kan aki sa laog kan tulak magpoon sa pangidam. An totoo asin enot na karapatan asin obligasyon kan mga magurang sa pagpapamidbid sa mga kaakian para sa karahayan sibiko asin kaoswagan kan karakter na moral kaipuhan magkamit nin pagtabang kan gobyerno.
Sek. 13. Minimidbid kan Estado an pinaka-importanteng obligasyon kan kaakian para sa pagpormar kan nasyon asin kaipuhan pakusugon asin atamanon an saindang karahayang pisikal, moral, espiritwal, intelektwal, asin sosyal. Kaipuhan kaining itanom sa isip kan kaakian an pagka-syudadano, nasyonalismo asin pakusugon an pagsali ninda sa mga trabahong pang nasyon asin sibiko.
Sek. 14. Inimidbid kan Estado an obligasyon kan kababaihan sa pagpormar kan nasyon asin kaipuhan siguruhon an igwaldad kan kababaihan asin kalalakihan.
Sek. 15. Kaipuhan manteneron asin atamanon kan Estado an poder sa salud kan mga syudadano, isaisip an pag-aram sa saindang salud.
Sek. 16. Kaipuhan atamanon asin ipagpadagos kan Estado an diretso kan mga tawo sa pantay asin marhay na ekolohya segun sa hinuyuhoy asin ugma kan panahon.
Sek. 17. Kaipuhan magtao nin prayoridad an Estado sa Edukasyon, syensya asin teknolohya, mga artes, kultura asin isport tanganing maparambong an pagka-syudadano asin nasyonalismo, mapadali an kaoswagan kan sosyedad, asin mamantener an biyong paglibre asin pa-oswag kan tawo.
Sek. 18. Pinatotoohan kan Estado na an trabaho sarong primerang pwersa sa ikakabuhay kan sosyedad. Kaipuhan kaining magtao nin proteksyon sa mga trabahador, asin manteneron an saindang karahayan.
Sek. 19. Kaipuhan magpormar an Estado nin ekonomya nasyonal
