Sek. 3. An Komisyon kan Serbisyo Sibil, bilang sentrong sangang
pantawohan kan Gobyerno kaipuhan mag-establisar nin sarong career
service asin mag-adaptar nin mga paagi tanganing mapaoswag an
entusyasmo, pagka-episyente, integridad, preparasyon, pag-oswag,
asin kortesya sa serbisyo. Kaipuhan kaining pakusugon an sistema
sa merito asin papremyo, pagsararuon an gabos na programa sa pagpapaoswag kan rekursong tawo para sa gabos na lebel asin ranggo, asin
muknaon an sarong palibot sa pamamahala na oyon sa pagsimbag kan
publiko. Ini kaipuhan magsumitir sa Presidente asin sa Kongreso nin
taunang report kaini manungod sa mga programanag pantawohan.
Sek. 4. Gabos na opisyal asin emplyadong publiko kaipuhan manumpa o mag-apimar na protektahan asin dependeran an Konstitusyon na ini.
Sek. 5. An Kongreso kaipuhan magtao para sa istandardisasyon kan kompensasyon kan mga opisyal asin emplyado kan gobyerno, kairiba idtong nasa mga korporasyon na sadiri o kontrolado kan gobyerno, na igwang orihinal na karta, na kinokonsiderar an klase kan responsabilidad manungod sa asin an mga kwalipikasyon na kinakaipuhan sa saindang mga pwesto.
Sek. 6. Daing kandidato na nadaog sa arinman na eleksyon an kaipuhan nombraran sa laog nin sarong taon makalihis an siring na eleksyon, sa arinman na katongdan sa Gobyerno, o sa arinman na korporasyon na sadiri o kontrolado kan gobyerno o sa mga sanga kaini.
Sek. 7. Daing elehidong opisyal an kaipuhan maging dapat sa arinman na katongdan o posisyon sa panahon kan saiyang pagkapot nin pwesto.
Apwera kun tinutugutan kan ley o kan mga pang-enot na gibo kan saiyang posisyon, dai dapat magkapot an siisay man na nombradong opisyal nin ano pa man na subdibisyon, ahensya, o instrumentalidad kaito kairiba an mga korporasyon na sadiri o kontralado kan gobyerno o sa mga sanga kaini.
Sek. 8. Daing elehido o nombradong opisyal publiko o emplyado an kaipuhan magresibe nin dagdag, doble,o indirektong kompensasyon, apwera kun siguradong tinutugutan kan ley, o magresibe nin anuman na regalo, kompensasyon, katongdan, o anuman na klaseng titulo hale sa arinman na gobyerno kan ibang nasyon.
