Sa gabos na oras oras pinagpapadarhan
sa aga sa odto sagcod pamanggihan
laen pa caiyan sarisaring bagay
na mga cacanon sucat caogmahan
Sari-saring gubing pinapapadarhan
na bobolsan baga agñay sa may helang
tamong asin mantel cama pang higdaan
anan de labores huling namomótan
Ipagpadigdi ta sa Hadeng Don Diego
riboc an isip nia con baga paano
huli sa cadaclaa na nagñagtutuyo
Hade ó Principe taga ibang Reino
Tolos na inapod apat na Princesa
caining halangcao daculang Monarca
pinagsarosaro na pinag-osisa
con isay an gusto sa cadaclan baga,
Sa hapot can ama tolos na nag simbag
apat na guinaha olay na banayad
o Monarcang bantog na Sacre Majestad
balang cabotan mo dai nin maliuag
An olay nin Hade con siring caiyan
aco paguiguibo granadang bulauan
an aponan nindo macasalo caiyan
iyong mani agom o esposong tunay
Ipinatanid na sa real cabildo
an gabos na grandes mga coronado
iguang mantenedor siang ibinoto
siring sa ogale nin pagtotorneo
An orden nin Hade poro magcabayo
siring sa guerrero may pito colito
granadang bulauan iyan macaşalo
iyong magcacamit nin daculang premio
Sa icatlong aldao an termino nia
can pagtotorneo sa tahao nin plaza
sa togñod nin balcon caining real sala
magñag catiripon grandes na gabos na
