Mahamís an símuy na sa pagliwánag
Pigtataboytáboy maalimyong búrak
Mahamot na párong sadyang nagwawarak
Dian nganí sa langtad;
Mahamis mayambot, hinghing na mabansay
Kan sápang mahoyó, pírak an kabágay
Na hinohubadan sa talikalang bulawan,
Maputing aljofar;
Mahamis an huni gamgam mapang-awit,
Mayambot an amyo búrak na marikit,
Puting daliwawa asin ta an yímit154
Mayambot asin mahamís.
Kundi an ngaran mo, Pádreng minamahal,
Dalísay na hamís nakaldit sa daghan,
Saen an liwanag minátaong bangraw
Mayambot na sírang.
Nin saró na Amá kami tinaohan
Kan sa Dios na kamot Amang mapagmahal
Nin pagkabuhay mapait na dalan
Kami kinakanoroan.
!Ay! anó man bayá mangyayari ngápit
Kan sa akí pang pagmamalasakit
Na sa daghan nyamó maláad na pírit
An simong pagmahal?
Kami simong akí, samó kang kanoró,
Sa mga ontokan magkagúrang na bió,
Bakong an dásig kan ísip mahiró
Pilótong saró.
Dakúlang Apostol dara mo an ngaran
Na simong sinósog mga binatayan,
Warasan ka logod kan diosnon na úgay
Banal na yaman.
Enero 25, 1881.
<154 Párong.
