sirá!"
"Kun an naggogobierno sarong mangmang . . . sabihi ako kun ano an kamugtakan kan saimong payo asin tataraman ko ika kun paano an saimo! Alagad hilingá nindo, kun an mga magkaratóod nagpapatinarabangtabangan; ipinaghahágad nin mitra si Padre Salvi kan mga pahayagán."
"Asin ta magkakaigwa sya! Kakamikamihon iyán!"
"Naniniwalá ka?"
"!Anó ta dai! Ngunyan minsan sa anong bagay itinatao iyán. May naaraman akong saró na kadikit pang magkamit kaiyán; suminurat nin sarong obritang chavacana, pinatunayan nya na daing ibang karapat-dápat sa mga indio kundi mga manggagamlang...!psh! mga sa gurang na gibo!"
"!Totoo! An siring na mga injusticia nakakaraot sa Katinubdan!" an sabi nin saró, "kun igwa sanang mata an mga mitra asin makahiling kun sa anong mga payo..."
"Kun an mga mitra katuyohan kan Katalagahan," an dúgang na tataramon nin sarong bohod, "Natura abhorret vacuum..."
"Huli kaiyán pinoporógol ninda, nabobótong sinda kan lowong" (119-a), an simbag nin saró pa.
An mga ini asin iba pang mga bágay pinagngoroorawihan sa mga convento, asin nagpapasalamat kami sa samong mga parabasa nin ibang mga comentarios na may mga sa polikang metafisico o mga makakakólog. Dadarahon mi an nagbabasa sa harong na particular, asin huli ta sa Manilá kadikit an samong mga kamiridbid, padumán kita sa harong ni Capitán Tinong,táwong mainaladka, na nakita niyamó na pirit na inaanyayahan si Ibarra tanganing padanggan sya kan saiyang pagdálaw.
Sa magayon asin mahiwas na bidang kan saiyang harong sa Tondo, nagtutúkaw si Capitán Tinong sa malápad na sillón, pinaghahaprós su saiyang angog asin lóong na nagpapahiling nin kamondoan, alintanang su saiyang agom, si Kapitanáng Tinchang, naghihibi asin pinagraraboraban sya sa atúbang kan saindang duwang áking babaye, na naghihirimaté sa sarong sógod daing karaalo, nagkakamarangmang asin nagkakaroyogtó.
"!Ay, Virgen nin Antipolo!" an kurahaw kan babaye, "!Ay, Virgen del Rosario asin de la Correa! ay!
