nod kan mata kan gurang su carro sagkod na napará sa harayó, nagdanay nin nagkapirang hidalé na baga may iniisip asin dokó; dangan sinákit sa pagtitindog, sinosog su dalan pasiring sa saiyang harong, minapahingaló diit-diit.
Sa hilom ibinaretá kan telégrafo sa Manilá su nangyari, asin pakalihis nin tolong poló may anom na oras pinagsambit na ito kan mga pahayagán dara an makúring misterio asin bakong diit na paharé, dinodugangan, sinasagwé asin liniliwat kan fiscal. Alintaná, mga baretang particular, na naghahalé sa mga convento, iyong mga enot na magpakalakop, sa hilom, asin sa dakúlang kangirhatan kan mga nagpakaáram kaito. Su nangyari, na nagkariliwat sa sangribong baretá, pinaniwalaan na gayo sunod sa naooyonan o sinosólang kan mga kamatean asin sunod sa pagisip nin lambang saró.
Su kamoninongan kan banwaan dai man nahahayag na nariribarawan, sa ibábaw naghahadé an katiwasayan sa pagsadiri siring sa bayongan nin sirá; alintánang mahimong sa ibabaw, sa irárom nanggolimay, nangdorodaralagán asin nagpaparalamagan an mga sirang dai nakakapagtaram. Sa mga mata kan ´mga tawo sa sarong gampi kan banwaan minaladawan an mga cruces, mga condecoraciones, mga galón, mga empleo, dangog, kapangyarihan, mga dignidades, asin iba pa, baga kalibangbang na naglalayawlayaw, asin ibinibilang na makakapagwaras sainda nin kuwartang bulawan. Sa saró man na sógod kan banwaan, sa harayó lominataw an sarong madiklom na pangánod, nangibabaw sa abohon na tugmaran, siring na maitom na mga ladawan, mga rejas, mga talikalá pati mga makangigirhat na móog kan bitayán. Linoluha na nagdaging sa doros su mga paghapot su mga hátol, su mga kinuráhaw kan mga pinasasakitan, su Marianas asin su Bagumbayan nangangaladawan paratós nin parásing asin madugong mga lambong, mga parasirá asin mga sirá sa malábog. An pangyari ilinaladawan kan Kapaladan sa pagisip kan mga taga Manilá siring sa mga abanico sa China, su sa ibong na pandok may
