nagagapus man síring kan duwang kambal ni Kapitánang María. An tolong ining hagbayon mga pormal
asin mga namamalos su lawog. Su húring lominuwas,
butás alágad sa táhaw nin duwang Guardia Civil. Malungsí su hagbayon; nangalagkálag nin lawog na katoód.
"Iyán an may salá!" an kuráhaw nin dakul na mga tingog; "iyán an may salá asin butás!"
"An sakong manúgang daing anó man na ginibo asin may posas!"
Inatubang ni Ibarra su mga bantay saiya: "Gapusa ako nindo, gapusa ako nindo nin marhay, balod!" an sabi.
"Dai nin pagboot samuyá!"
Kominúyog su mga soldados.
Tominunga su alférez nangangabayo asin patós nin hamo; pinagsosonod nin sampoló o kaglima pang soldados.
Duduman su lambang angkos nin bálang bilanggó na ipinakikimahérak sya, pinagtatangisan sya asin tinataohan sya nin mga mapagmahal na ngaran., Si Ibarra sana an daing siisay man; si Nor Juan mansana asin su paratokdó sa paadalan nagkawarará.
"Anong ginibo saimo kan sakong agom an sakong akí?" an sabi saiya ni Doray na nagtatangis; "hilinga an makauúgay kong akí! hinalé mo sa saíya an saiyang amá!"
Su kasakitan kan mga angkos náging kaangotan sa hagbayon, nasosombong na nagsadol kan kariribukan. Nagboot su alférez na lumakaw na.
"Saró kang matálaw", an kuráhaw saiya kan panugangan na babayé ni Andong. "Alintanang su iba nakikilaban huli saimo, ika nagtatagó, matálaw!"
"Isumpá ka logod!" an sabi saiya nin sarong gurang na lalaki na nagsusunod saiya; "isumpá logod su bulawan na natipon kan saimong angkos sa paglaglag kan samong katiwasayan! Isumpá! Isumpá"
"!Awot pa logod na bilingan ka, hereje!" pinagkukurahawan nin sarong babáyeng kadugó ni Albino, asin dai nakapagpógol hominakbot nin gapó asin idinaklag saiya.
Madaleng inárog an panalmingan na ito, asin su daing pálad na hagbayon nagoran nin alpog asin gapó.
Tinios ni Ibarra daing girong, daing kaangotan, da-
