Oroapling sa atubangan si Doña Consolación, tiringting su mga ugat sa liog, su mga mata nakapotitok sa ngiri na pintó.
Sarong malipungaw na ladawan lominuwas nasa pagoltanan nin duwang soldados, si Társilo, na túgang ni Bruno. May posas sa kamot, su saiyang badó, parásing, nagbubuyagyag nin hinorósog na panglawas. Su saiyang mga mata mapag-agyat na ipinotitok sa agom kan alférez.
"Iyo ini an nanumang na marhay sa orog na kadasigan asin pinadurulag su saiyang mga pagiriba," an sabi kan alférez ki Padre Salvi.
Sa hurihan may nakakasonod na sa napahámak su panglawog, nagmomondó asin nagngongoyngoy na garong aki, nagkikiaykiay asin may dugó su pantalón.
"Kaheraki man pó, kaheraki! dai na ako málaog liwat sa patio!" an saiyang ipigkukurahaw.
"Sarong amamagrot," an pabatid kan alférez sa cura na saiyang kaolayólay; madulag kutá, alágad tinamaan sa paa. Iyo sana an duwang ini an búhay na nasa kamot."
"Siisay mo ngaran?" an hapot kan alférez ki Társilo.
"Társilo Alasigan."
"Anong ipinanugá saindo ni Don Crisóstomo tanganing salakaton nindo su Cuartel?"
"Sagkod pa man si Don Crisóstomo dai nin pakigsinabotan samuyá."
"!Dai ka magpainda! Sa bágay na siring, boot kami nindong tarakaon."
"Nagkakamalé kamo ginadan nindo sa pákol su samong amá, ipinanghimalos mi lámang sya."
"Hanapa nindo su saindong duwang pagiriba." Napángálas su alférez asin ta hiniling su sargento.
"Iritoon sa sarong angpas, ihinorolog mi kasohapon, dumán magkakaralapá. Ngunyan gadana ako nindo; dai na kamong maaraman pang iba."
Daing girirongan asin nagngataka su kagabsan.
"Sasabihon mo samuyá kun sairisay an saimong mga kasapakat," an paharé (117-a) kan alférez na pinahagbrob su badas.
Sarong mapagbasangbásang na hoyom namantaág sa ngosó kan bilanggó.
Sa laog nin nagkapirang hidalé, sa hababang tingog, kinaolay kan alférez su cura, dangan inatubang su mga soldados.
