mga iriwal na inaasusang kan satong mga kamatean.
Maninigo, kinakaipuhan, matanos na magtaga hokom
an tawo sa saiyang kapuwa!”
“Oho, sa paggibo nin karahayan, bako nin maraot, sa pagsagwa sa pagpakarhay, bakong sa paglaglag, huli ta kun magkamalé an saindang mga paghokom, dai sya nin kapangyarihan sa pagpakarhay kan karatan na saiyang naginibo.” “Alagad,” an sabi pa na nagliwat nin bahana (402), “an pagosiposip na ini nasa ibabaw kan sakong mga kusog, asin linilingalinga taka ngunyan na pinaghahalat ka ninda. Dai mo malingawan an sinasabi ko pa sana saimo; igwa kang mga kaiwal, magpakabahay ka sa karahayan kan saimong bansa.”
Asin pominaaram.
“Noarin ko ika makikita liwat?”
“Sa giraray kun boot mo asin sa giraray kun pakikinabangan mo ako. Sagkod ngunyan nagkakatabang
pa ako saimo!”
AN PANGODTO
Duman sa ibaba kan sinamnohan na kiosko nagkaraon su mga darakilang tawo sa lalawigan.
Su Alcalde nasa sarong poro kan latok; si Ibarra, sa ibong. Sa totoo dapit kan hagbayon nagtutukaw si Maria Clara, asin sa wala niya, su escribano. Si Capitan Tiago, su alférez, su gobernadorcillo, su mga fraile, su mga empleado asin su nagkapirang daraga na nagpawaralat nagturikaw bakong sunod sa saindang kamugtakan, kundi oyon sa saindang kamuyahan.
Makadadagkang gayo asin maogma su pangodto, alagad pangabangaan may dominatong na sarong empleado sa telégrafo pighahanap si Capitan Tiago, may darang paisi. Si Capitan Tiago, ugalé nang naghagad nin pahintulot sa pagbasa kaito, asin su gabos ugalé nang ominoyon saiya.
An kaniguan na gayong Capitan nangorondot ngona, dangan tominongkahal: luminamuti su saiyang lawog, suminalinggaya, asin madaleng tiniplok su papel asin tominindog.
“!Mga Ginoo,” an sabi na nariribaraw, “An saiyang Kahalangkawan, su Capitan General madatong ngun-
