sa saiyang mamintingang ngoso an maginhawang burabod
nin pagkabuhay na daing kasagkoran. Kahalangkawan sa
kahologan, kapangdalé-dagoan sa mga pagiisip, kabag-ohan
sa mga kataga nin tataramon. Kagayonan sa pananaramon,
katutubuan sa hirohiro, kabansayan sa pagtaram, kadasigan
sa mga kaisipan, iyo inian mga kakayahan kan Bossuet na
kastila, na matanos na gayong nagkamit kan saiyang halangkaw
na dangog bako sanang sa mga kastilang mga halangkaw an
pakanood kundi sagkod man sa mga indio na mga daing
pakasabot asin sa mga tikas sa marhay na boot na mga
aki kan langitnon na Imperio.”
Alagad su tiwalang gayong corresponsal kadikit na sanang dai mapiritan na punason su gabos niyang isinurat. Nasorosipon si Padre Damaso ta kan bangging ominagi pakatapus nin pagawit nin nagkapirang awit kominaon nin tolong basong sorbete asin nagdalan pa sa hilingon nin kadikit na horas. Nin huli kaini, habo na siyang dumagos na magsaysay kan tataramon nin Dios sa mga tawo, alagad mantang dai nin nasompongan na tatao kan btihay asin mga gibong ngangalasan ni San Diego de Alcala,—totoo ngani na su cura tatao, alagad iyong mamisa, su ibang mga religioso sararo sa saindang ganan na dai mapapakarhay an daging kan tingog ni Padre Damaso asin makakorokanogon na dai madagos an siring karayrahay na sermon na isinurat asin tinoom na. Huli kaini, su babaye na saiyang dating pinagwawaniwani kaito iginibo siya nin limonada, linahidan su saiyang daghan asin liog nin mga panglahid asin lana, pinatos siya sa mainit na mga yamit hinilot siya, asin dakol pang ibang ginibo. Si Padre Damaso naginom nin hilaw na sogok na binati sa alak, asin sa bilog na pagkaaga daing gironggirong asin dai namahaw; pahangang ominom nin sarong basong gatas, sarong tasang chocolate na may kaibang kagduwang bizcocho, pinabayaan na gayo su saiyang adobadong manok asin su saiyang kabaak na queso ta sabi kan nagataman saiya an manok asin an queso may asin saka mantika na mga nakakapaabo.
“!Gabos na ini sa pagkamit kan kamurawayan asin sa pagkabirik kan satong boot!” an sabing may kalodokan kan mga hermanas kan Venerable Order Tercera kan maaraman ninda an siring na mga pagpakasakit.
