Dios: su preste napapandongan nin sarong palio na dara kan mga cabesa de barangay, asin kahurihurihi su pangkat kan Guardia Civil. Sa paghona ko dai na kaniguan na sabihon ko pa na su duwang (2) taytay kan procesion binibilog nin dakulaon na bilang nin mga indio, na sa makuring kalodokan may mga darang kandila na mga may dokot. Su musica nagtotogtog nin mga pangkatinubdan na togtog; surunodsunod su mga potok kan mga bomba asin mga ruedang kalayo. Makangangalas an kahoyoan asin kalodokan na ipinapasabong kan mga gaweng iniho sa puso nin mga nangagtutubod, an dalisay asin dakulang pagtubod na saindang ipinanonongod sa Virgen nin Katiwasayan, an kaogmahan asin malaad na kalodokan sa paggibo nin siring na mga kapiyestahan nyatong mga nagkapalad na magkamorondag sa irarom kan sinanglitan asin malinigon na wagayway kan España.
“Pakatapus kan procesion, pinonan su misa na tinogtogan kan musica asin iyong nagkaranta su mga artista sa Teatro. Pakaevangelio, suminakat sa pulpito an Kagalanggalang na gayong Padre Fray Manuel Martin, sarong agustino na halé sa Batangas, na huli kan saiyang mga kataga nagkamurongnan su gabos na nagdadarangog, orog na su mga kastila sa mga pangenot na tataramon sa kastila, na madasig (359) asin mga kataga nin tataramon na daing kapawotan asin tamangtamang sabihon, na nakapano sa samuyang mga puso nin kalodokan asin kahimonan. An tataramon na ini, kun siring, iyo an dapat itao sa nakakamaté o namamatean kun mapdaapit sa Virgen asin sa minamahal nyatong España, orog nang gayo kun ikakasalipat sa texto, mantang sa pinagoorolayan, an mga kaisipan nin sarong hiyanta (360) kan Simbahan, si señor Monescillo, na iyong gayo an sa kagabsan na mga kastila.
“Pakamisa nagsarakat kami gabos sa convento sa kaibahan kan mga lataw na tawo sa banwaan asin nin iba pang mga haralangkaw na mga tawo, na pinagaagihan kan pagkamainaladka asin mapangataman na ikinapapalaen kan Kagalanggalang na si Padre Fray Salvi na nagdusay sainda nin mga tabako asin nin mga masisiram na mga kakanon na hinanda kan Hermano Mayor sa sirong kan convento sa kiisay man na boot malinga an saiyang tulak.
“Sa bilog na maghapon daing ano man na nagkulang
