“Napiritan kaming omoyon sa siring kadakulang paanyaya, minsan ngani boot ko kutanang magpahingalo sa mga kamot ni Morfeo tanganing mahingaloan na lubos an mga nakokologan na mga kabtang kan sakuyang hawak: na gikan sa mga linggilinggi kan lunadan tinamo samuya kan gobernadorcillo sa banwaan nin B.
“Sa bagay na ini, nagrulusad kami sa paghanap sa samong mga pagiriba na namaranggi sa harong digdi kan banal asin mayaman na si Don Santiago de los Santos. An cura sa banwaan ini si M. R. Fray Bernardo Salvi, si M. R. P. Damaso Verdolagas na huli sa sarong napapalaen na gayong biyaya kan Kahorohalangkawe madalé nang maomayan sa mga kolog na ipinamaté saiya nin sarong maliwag na kamot, sa kaibahan ni M. R. P. Fray Hernando de la Sibyla asin su banal na Cura sa Tanawan, asin iba pang mga kastila iyong mga inanyayahan sa harong kan filipinong Creso. Duman kami nagkaigwa nin palad na samong mapagtakahan bako sanang su mga masisiram na handa asin pagkamainaladka kan kagharong kundi sagkod su mahalaga, magayon asin mayaman tagapagmana, na nagpamidbid na sya adal na bulanos ni Santa Cecilia, kasu magtogtog sya nin mahusay sa saiyang marayrahay na piano, na huli ngani kaini, sakuyang nagiromdoman si Galvez, su mga magagayon na mga composicion na mga alemania asin mga italiana. Kanogon pa na an siring kadaingkakundian na binibini lumuwas na malolot an boot asin tagoon an saiyang mga kaogdan sa katiripunan, na daing ibang itinatao saiya kundi mga pagtaka. Dai ko sikat malingawan na sambiton digdi na sa harong kan nagkaya pinainom kami champaña asin mga dalisay na inomon na nagngasawang lubos na iyong ikinalalaen sa iba kan midbid na capitalista.
